Նոր Սիովն ծնեալ մանկունք

Նոր Սիովն ծնեալ մանկունք սուրբ Աւազանաւն. շնորհազարդեալք Հոգւովն Աստուծոյ.
օրհնեցէք զՀայրն երկնաւոր յաւուր ծննդեան սրբուհւոյ կուսին. յոր օրհնեցայք յանիծից նախնւոյն:

Արեամբ Գառինն անարատի փրկեալք ժողովուրդք. յաւուր ծննդեան մօր անտանելւոյն.
գովեցէք զՄիածինն որ հաճեցաւ առնուլ մարմին անսերմն ի նմանէ. յոր օրհնեցայք յանիծից նախնւոյն:

Յառատաբուղխ շնորհաց հոգւոյն լուսազարդեալք ազգք հեթանոսաց, յաւուր ծննդեան Մօր Բանին ծնողի.
զփառակից Որդւոյ զՀոգին. բարեբանեցէք հոգևոր երգով, որ մաքրազարդեաց զմարմնարան Որդւոյն: