Պրիմիտիվ սյուժե ու երկխոսություն չէ, որը ֆիլմն ուղղակի «խնդալու ու հռհռալու» կինո կդարձնի. Արծրուն Չոբանյանը՝ նոր կինոկատակերգության մասին

Ռեժիսոր Մհեր Մկրտչյանի՝ «Լյուդվիգ անունով ոզնին» կինոկատակերգության նկարահանման ընթացքի մասին Aysor.am-ն արդեն տեղեկացվել է: Ֆիլմում նկարահանվում են ինչպես արդեն ճանաչում ձեռք բերած դերասաններ, այդպես էլ՝ սկսնակներ, որոնց համար էկրանային այս աշխատանքը դեբյուտային է լինելու: Ռեժիսոր Մհեր Մկրտչյանի մոտեցումն է՝ «հայտնաբերել» ու հանրությանը ներկայացնել նոր ու տաղանդավոր անուններ:

Դերասան Արծրուն Չոբանյանն, ով հեռուստադիտողին ծանոթ է դեռ «Կյանք ու կռիվ. 25 տարի անց» ֆիլմից, ընդգրկված է նաև Մ. Մկրտչյանի նոր կատակերգությունում: Մարմնավորելու է գլխավոր հերոսներից Կարենին:

«Կարենը դերասան է, ով այսօրվա շատ դերասանների նման ինստիտուտն ավարտելուց հետո մասնագիտական գործ չգտնելով՝ տարբեր վայրերում է աշխատում: Կերպարս պատահական հրավեր է ստանում՝ ֆիլմում նկարահանվելու համար քասթինգի մասնակցելու, ու մասնակցում է… Սա լիրիկական կատակերգություն է, որը պատմում է, թե ինչպե՞ս կարող է պատահական կամ ոչ պատահական հանդիպումը մարդու կյանքում մեծ փոփոխություններ մտցնել», – մեզ հետ զրույցում մանրամասնեց դերասանը:

Այս ֆիլմում Արծրուն Չոբանյանի հիմնական խաղընկերներն են Սամվել Թոփալյանը, Անի Ղազարյանն ու Ժան Նշանյանը: Նկարահանվել են նաև Գեորգի Հովակիմյանը, Մարինա Մնացականյանը, Գուրգեն Սարգսյանը, Քրիստինա Հովակիմյանը և այլք:

Ի դեպ, «Լյուդվիգ անունով ոզնին» վերնագիրը պայմանական է ընտրված՝ ֆիլմում իր դերակատարությունն ունեցող ոզնու անունով:

«Չգիտեմ՝ կփոխվի վերնագիրը, թե ոչ, բայց եթե այսպես էլ մնա, ապա հանդիսատեսը միայն նայելուց հետո կհասկանա, թե ինչու է այդպես կոչվել», – նշեց նա:

Անդրադառնալով քիչ թե շատ տարածված այն կարծիքին, թե Մհեր Մկրտչյանի հետ աշխատելը բավական բարդ է, նկատեց.

«Ես էլ եմ նման դժվարությունների մասին լսել, բայց պետք է խոստավանեմ, որ թեև սա մեր երրորդ համագործակցությունն է, բայց ես բոլորովին բարդություն չեմ ունեցել: Ինձ համար իր հետ աշխատելը շատ հետաքրքիր է, դերասանին «բացում» է, օգնում՝ առավել պրոֆեսիոնալ լինել»:

Երիտասարդ դերասանը վստահ է՝ այս ֆիլմը կառանձնանա դաշտում եղած մյուս կատակերգություններից, քանի որ շերտերը բազմազան են թե՛ սցենարական տեսանկյունից, թե՛ սյուժետային:

«Պրիմիտիվ սյուժե ու երկխոսություն չէ, որը ֆիլմն ուղղակի «խնդալու ու հռհռալու» կինո կդարձնի: Կարծում եմ՝ սա մի այլ որակ է բերելու», – Aysor.am-ի հետ զրույցը եզրափակեց Արծրուն Չոբանյանը: