USD
EUR
RUB

Ինչպե՞ս է Վրուբելի կտավը հայտնվել Ռուսաստանում․ չափազանց հետաքրքրված են նաև թանգարանի աշխատակիցները

 
 

«Միխայիլ Ալեքսանդրովիչ Վրուբելի՝ Հայաստանից գողացված աշխատանքը կվերադարձվի»,-դեռ մարտին, Վլադիմիր Պուտինի հետ Մոսկվայում կայացած համատեղ ասուլիսում հայտարարեց նախագահ Սերժ Սարգսյանը:

Ռուսաստանի նախագահը խոստումն իրականացրեց երեկ՝ Սերժ Սարգսյանին հանձնելով 22 տարի առաջ Երևանի Ռուսական արվեստի թանգարանից գողացված Միխայիլ Վրուբելի «Դևը և հրեշտակը Թամարի հոգու հետ» կտավը:

1890-ականներին ստեղծված գծանկարը Միխայիլ Լերմոնտովի «Դևը» պոեմի նկարազարդումներից է: Նկարը եղել է բալետի ռուս պարուհի Եկատերինա Գելցերի հավաքածուում: Հետագայում այն գնել է մասնագիտությամբ բժիշկ, պրոֆեսոր Արամ Աբրահամյանը, որի նախաձեռնությամբ և անձնական հավաքածուի հենքով ստեղծվել է Երևանի Ռուսական արվեստի թանգարանը:

22 տարվա վաղեմությամբ քրեական պատմության հետքերով այսօր Իսահակյան 38 (Գաֆեսճյան արվեստի պուրակ) հասցեում գտնվող Ռուսական արվեստի թանգարանում էինք: Գլխավոր ֆոնդահապ Վերա Սեմյոնի Կալչուրինան փոխանցում է մանրամասները. «1995-ի հովհարաձև անջատումների ծանր շրջանն էր: Թանգարանի գիշերային հսկողությունն իրականացնում էին մասնագիտացված ծառայության աշխատակիցները՝ շների հետ միասին: Չարաբաստիկ օրը աշխատակիցը բացակայել էր՝ հսկողությունը թողնելով միայն կապած շանը, որը հաչելուց բացի, ոչինչ չէր կարող անել: Գողն այս մասին հավանաբար իմացել էր, նրան ոչինչ չէր խանգարել: Պատուհանը կոտրել, ներս էր մտել ու, կարծես թիրախավորված, գողացել Վրուբելի կտավը»,-պատմում է Վերա Կալչուրինան:

Ըստ նրա, հարուցված քրեական գործն էլ նման «լուռ» հանգուցալուծում ստացավ. անփութության համար դատապարտվեց ու դատարանի դահլիճից ազատ արձակվեց ոստիկանության աշխատակիցը: Կտավից լուր չկար մինչև 2017-ի մարտը՝ կտավի հայտնաբերման և այն Հայաստանին վերադարձնելու մտադրության վերաբերյալ Վլադիմիր Պուտինի «գաղտնազերծումը»: Ինչպե՞ս է Վրուբելի կտավը հայտնվել Ռուսաստանում. չափազանց հետաքրքրված են նաև թանգարանի աշխատակիցները:

Հույս ունեն, որ «գաղտնիքը» հասանելի կլինի նաև իրենց: Վրուբելի՝ գողացված ստեղծագործության վերատպած տարբերակը տնօրեն Մարինե Մկրտչյանի աշխատասենյակում է:

Կորստի մասին երբեք չեն մոռացել և այցելուներին էլ միշտ ցավով պատմում են այդ մասին: «Հիմա, իհարկե, ավելի հանգիստ ենք և սրտի տրոփով սպասում ենք Վրուբելի կտավի վերադարձին: Մինչև տեղ չհասնի, չտեսնենք, մեր ձեռքով չշոշափենք, հավանաբար չենք հավատա մեր երջանկությանը»,-ասում է գլխավոր ֆոնդապահը:

Միաժամանակ հավելում է, որ «Դևի» վերոնշյալ գրաֆիկական նկարազարդումից բացի, Միխայիլ Վրուբելից երեք աշխատանք ունեն թանգարանում՝ մեկը ֆոնդում, երկուսը՝ մշտական ցուցադրությունում: Դրանց թվում՝ 1880-ականներին ստեղծված «Սաֆոն» է, «Իսպանական պարուհին» էտյուդը, ինչպես նաև «Ծովի արքայադուստրը» ջնարակապատ խեցեղեն քանդակը:

Թանգարանը Կասկադի հիշյալ հասցեում գործում է 1984 թվականի նոյեմբերից: Վերա Կալչուրինան ասում է, որ պրոֆեսոր Աբրահամյանին երևանյան մի քանի հասցե են առաջարկել, բայց նա ընտրել է հենց այս տարածքը, որովհետև համոզված էր՝ այս բացառիկ հավաքածուն պետք է ներկայացնել Երևանի սրտում, մարդաշատ վայրում և ամենակարևորը՝ առանձին, ամբողջական թանգարանի տեսքով:

Թանգարանի հավաքածուն ներկայացնում է ռուսական արվեստի ծաղկման լավագույն շրջաններից մեկը՝ 19-րդ դարի վերջ, 20-րդ դարի սկիզբ: «Այստեղ իսկապես բացառիկ նմուշներ կան: Նման արժեքավոր հավաքածու ունեցող թանգարան չունի նախկին խորհրդային հանրապետություններից և որևէ մեկը»,-վստահեցնում է Կալչուրինան:

Երևանի ռուսական արվեստի թանգարանի տնօրեն Մարինե Մկրտչյանն ասում է, որ վերջին տարիներին այցելուների թիվը կտրուկ աճել է: Մեծ հետաքրքրություն են ցուցաբերում հատկապես դպրոցականներն ու Ռուսաստանից զբոսաշրջիկները: Նախորդ տարվա նույն ժամանակահատվածի համեմատ, այցելուների թիվն այս տարի աճել է շուրջ 30 տոկոսով: Թանգարանը վերջերս համալրվել է հայտնի քանդակագործ Նիկոլայ Նիկողոսյանի նվիրաբերած երեք ստեղծագործություններով՝ Արա Աբրահամյանի և նրա տիկնոջ դիմանկարներով և թանգարանի հիմնադրի կիսանդրիով:

Ալիսա Գևորգյան
ՀՀ մշակույթի նախարարություն

 

Լրահոս
Չար մշակների առակը (Մատթ. 21:33-41; Մարկ. 12 1-9; Ղուկ. 20:9-16) Սրտի խորքից խոսք քեզ հետ Հայաստանում Եվրոպական ժառանգության օրերի այս տարվա խորագիրն է «Կիսվելու արվեստը» Վահան Տերյան․ Բանաստեղծություններ... Հայաստանի պետական սիմֆոնիկ նվագախումբը նոր համերգաշրջանի մեկնարկը տալիս է նոր կարգավիճակում Մեկնարկում է «Թատերական Լոռի» 24-րդ միջազգային թատերական փառատոնը Խաչքարի օրհնություն և օծում Նորվեգիայի Կրագերո քաղաքում Երևանում և Գյումրիում կներկայացվի «Սասունցիների պարը» բալետը Օր` առանց սահմանի Եկո՜ւր, տաղտկալից կյանքըս խաղաղե Մի հուսահատվեք երբ ձեր ցանկությունները չեն կատարվում Սուրբ Աթանաս Մեծ Առաջին անգամ հանրայնացվում է Մարինա Սպենդիարովայի արխիվը ՀՀ անկախության 27-րդ տարեդարձին նվիրված պաշտոնական ընդունելություն Թբիլիսիում Չինաստանը կօգնի Սիրիային վերականգնել մշակութային ժառանգության օբյեկտները Ազգ փառապանծ Հայրենի հող Երկիր հայրենի ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ՈՒՂԵՐՁԸ ԱՆԿԱԽՈՒԹՅԱՆ ՏՈՆԻ ԱՌԻԹՈՎ Բանտում ստեղծագործողի ուսուցիչները ներկա են եղել նրա ցուցահանդեսի «Տմբլաչի Խեչանը»՝ արցախյան բարբառով «Շողակն» անսամբլ. Տիկ զարկեմ Տոնական համերգ «Զվարթնոցում» Մայրիկիս «Պար առանց սահմանների» ծրագրի զարգացման հետագա ուղիները Աղքատ Ղազարոսի առակը (Ղուկ. 16:19-31) Հայաստանի պետական կամերային նվագախումբի առաջիկա համերգի տոմսերը գրեթե սպառված են Նյու Յորքի «Մետրոպոլիտեն» թանգարանում կբացվի «Հայաստան» (Armenia!) ցուցահանդեսը Տիգրան Համասյանը «Գյումրիի համար» ալբոմից երգեր կկատարի Երևանում Ս. ԱՐԻՍՏԱԿԵՍ Ա ՊԱՐԹԵՎ Ավետիք Իսահակյան․ Այդ ոչինչը ես եմ Կորուստներդ խլող չկա Չալոն Հաճախ շրջագայող հայ լուսանկարիչը «հյուրախաղերի» է մեկնում այն երկիր, որը գնահատում է լուսանկարչական արվեստը Մեծամորում հայտնաբերվել է մ.թ. II-III դարերով թվագրվող տղամարդու թաղում Սերգեյ Սմբատյանը Հռոմում կղեկավարի համերգ՝ նվիրված Երևանի 2800-ամյակին Տիգրան Հեքեքյանը ահազանգում է` հերթական հուշարձան շենքը հատուկ խարխլել են Մահացել է գրականագետ և քննադատ Կարեն Ստեփանյանը Գուրգեն Մահարի Գնացքն առաջ է սուրում
website by Sargssyan