USD
EUR
RUB

Սուրբ Ստեփանոսի տոնին Մայր Աթոռում կատարվեց սարկավագական ձեռնադրություն

Դեկտեմբերի 25-ին` Սուրբ Ստեփանոս Նախավկայի հիշատակության օրը, որը նաև Հայաստանյայց Առաքելական Սուրբ Եկեղեցու անդաստանում ծառայող սարկավագների տոնն է, Միածնաէջ Մայր Տաճարում, հանդիսապետությամբ Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի, մատուցվեց Սուրբ և Անմահ Պատարագ, կատարվեց նաև սարկավագական ձեռնադրություն: Այս մասին տեղեկացնում է ter-hambardzum.net-ը։

Պատարագիչն էր Մայր Աթոռի Քրիստոնեական դաստիարակության կենտրոնի տնօրեն Գերաշնորհ Տ. Վարդան եպիսկոպոս Նավասարդյանը:

Նախորդ օրը՝ Երեկոյան ժամերգությունից առաջ, Մայր Տաճարում տեղի էր ունեցել դպրության, ուրարակրության և կիսասարկավագության տվչության արարողությունը: Գևորգյան հոգևոր ճեմարանի Բ լսարանի 13 սաներ ստացել էին դպրության, Դ լսարանի 16 սաներ ուրարակրության, իսկ 5-րդ լսարանի 12 և Քահանայից պատրաստության լսարանի ավարտած 4 սաներ` կիսասարկավագության աստիճան:

Ս. Ստեփանոսի բերկրառատ տոնի առիթով, օրհնությամբ Ամենայն Հայոց Հայրապետի, Վարդան Սրբազանի ձեռամբ սարկավագական ձեռնադրության արժանացան Գևորգյան հոգևոր ճեմարանի և Քահանայից պատրաստության լսարանի 16 սաներ:

Ձեռնադրության ավարտին Սրբազան Հայրն անդրադարձավ տոնի իմաստին ու Ս. Ստեփանոսի նահատակության պատմությանը՝ նշելով, որ Սուրբ Ստեփանոսը համաքրիստոնեական առաջին նահատակը դարձավ իր հավատքի ապրումով և վկայությամբ: «Սուրբ Ստեփանոս Նախավկայի հիշատակության օրը մեզ համար նախնյաց կողմից հրավեր է` նորոգելու մեր ծառայության ուխտը, որ է` ծառայություն ընտանիքին, ազգին ու ժողովրդին, և մանավանդ`Աստծուն և եկեղեցուն», — ասաց Սրբազանը:

Նորընծա սարկավագներին ուղղված իր խոսքում Սրբազան Հայրը նշեց. «Տիրոջ լուծը խորհրդանշող ուրարը, որ այսօր ձեր ուսերին դրվեց, նաև ձեր միջավայրի, ժողովրդի կողմից երբեմն չհասկացվելու, փշոտ, դժվարին ճանապարհով ընթանալու նշան է: Սակայն ինչպես մեր ամենքի հավատքի աղբյուր Հիսուս է ասում, եթե հավատաք Նրան, Նրա հետ միության կատարյալ գիտակցությամբ ապրեք, ձեր կյանքում կխոսի Հիսուս, և ձեր շուրթերից Տիրոջ խոսքը կհորդա ու կտարածվի հավատացյալների սրտերում ու հոգիներում, դուք ձեր ծառայությամբ մի մասնիկը կդառնաք Մայր Աթոռ Սուրբ Էջմիածնի առաքելության, և այդպիսով այդ լուծը կքաղցրանա ձեր կյանքում»:

Սարկավագական ձեռնադրություն կատարելու կապակցությամբ Վարդան Սրբազանն իր որդիական երախտագիտությունը հայտնեց Գարեգին Բ Հայրապետին` նշելով, որ այսօր Վեհափառ Հոր առաջնորդությամբ Մայր Աթոռ Սուրբ Էջմիածնի հոգևոր-կրթական հաստատությունները նոր ավյունով` հավատքով, նոր սխրանքների, մեծ գործերի պատրաստ երիտասարդներով բերում են լրացնելու միաբանության շարքերը:

Ս. Պատարագի ավարտին եկեղեցականաց դասը և ներկա ժողովուրդը հնարավորություն ունեցան համբուրելու տոնի առիթով Մայր Տաճարի ավանդատուն-թանգարանից հանված Ս. Ստեփանոսի մասունքով Աջը և ստանալու նրանից ճառագող օրհնությունը:

Հավարտ սուրբ Պատարագի Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունեց Մայր Աթոռի բոլոր սարկավագներին ու նորընծաներին` ուղեկցությամբ Մայր Աթոռ Սուրբ Էջմիածնի լուսարարապետ Գերաշնորհ Տ. Հովնան եպիսկոպոս Հակոբյանի, Մայր Աթոռի Քրիստոնեական դաստիարակության կենտրոնի տնօրեն Գերաշնորհ Տ. Վարդան եպիսկոպոս Նավասարդյանի և Գևորգյան հոգևոր ճեմարանի տեսուչ Հոգեշնորհ Տ. Գարեգին վարդապետ Համբարձումյանի:

Սարկավագաց դասն ընկալյալ ավանդության համաձայն երգեց «Ստեփանոս, քաղցրիկ տատրակ» տաղը, ապա Նորին Սրբությունն իր օրհնությունն ու բարեմաղթանքները փոխանցեց սարկավագներին:

Շնորհավորելով ամենքին տոնի կապակցությամբ` Նորին Սրբությունը հորդորեց սարկավագներին մշտապես իրենց աչքի առջև ունենալ Ստեփանոս Նախավկայի ոգեշնչող օրինակը, սիրել Աստծուն, անմնացորդ ու անսակարկ ծառայել Քրիստոսի սուրբ Եկեղեցուն:

Ամենայն Հայոց Կաթողիկոսը մասնավոր իր ուրախությունն արտահայտեց 16 սարկավագների ձեռնադրության առիթով` վստահություն հայտնելով, որ նորընծաներն իրենց անձնդիր աշխատանքով ու նվիրյալ ջանքերով իրենց նպաստը կբերեն մեր ժողովրդի և Եկեղեցու առջև ծառացած մարտահրավերների ու խնդիրների հաղթահարման գործին` հույս ներշնչելով դեպի Հայոց Եկեղեցու վաղվա օրը:

Ամենայն Հայոց Կաթողիկոսն իր գնահատանքն ու օրհնությունը բերեց նաև միաբան սարկավագներին` պատգամելով նույն ոգով ու նախանձախնդրությամբ շարունակել իրենց սպասավորությունը Մայր Աթոռին և անբասիր ծառայությամբ հայորդիների համար սիրելի դարձնել Հայոց Եկեղեցին:

Հայոց Հովվապետը մաղթեց, որ Երկնավոր Տերն իր առատ օրհնությունը հեղի սարկավագների վրա, որպեսզի տերունապարգև շնորհներով արդյունավետ դարձնեն իրենց հոգևոր սպասավորությունը:

Վերջում Նորին Սրբությունը «Պահպանիչ» աղոթքով օրհնեց սարկավագաց դասին` տոնի առթիվ ամենքին ընծայելով հոգևոր գրականություն:

Մայր Աթոռ Սուրբ Էջմիածինն ունի 141 միաբան սարկավագ, ևս 39 սարկավագներ ուսանում են Գևորգյան հոգևոր ճեմարանում:

Լրահոս
«Թաբոր լեռան վրայ» Պյոտր Սվիտալսկի․ «Սարյանը Հայաստանի այցեքարտն է Եվրոպայում» Մենք հաճախ կենտրոնանում ենք բաժակի վրա՝ մոռանալով վայելել սուրճի համը Ռուբեն Սևակ․ Դուն Հրաշքն ես Սերժ Սարգսյանը՝ ՀՀ ապագա նախագահի մասին․ «Նա պետք է վայելի հեղինակություն և որ ամենակարևորն է՝ անկողմնակալ մարդ լինի, ով երբեք քաղաքականությամբ չի զբաղվել» Նախագահ Սարգսյանը Հայաստանի ազգային հերոս Հովհաննես Չեքիջյանին հանձնել է Հայրենիքի շքանշանը Հայոց եկեղեցու կացությունը Սովետական իշխանության արշալույսին ՈՒրիշ ձկներ են ջրում Սոս Ջանիբեկյանը, Մաց Լանգբական, Տատյանա Սպիվակովան ու Նաիրա Զաքարյանը՝ Ջիվան Ավետիսյանի «Դրախտի դարպասը» ֆիլմում Քելե, քելե Սարկավագուհիների ավանդույթի վերականգման հարցում պետք է զգույշ լինել. Վահրամ քահանա Մելիքյան Արտերկրում գործող միակ պետական հայկական թատրոնի դերասանները հնրավորություն կունենան հանդիսատեսին ներկայանալ սեփական, վերանորոգված թատրոնի շենքում Էլ իմաստ չունի... Ընտրուեց Գերմանիոյ Հայոց Թեմի համար Առաջնորդական Տեղապահը Նախանձի մասին (բարոյախրատական պատում) Դեպի բանակ ճանապարհը անցնում է եկեղեցով Շքեղ հայկական թատրոն Հայաստանի սահմաններից դուրս․ Տիգրան Վիրաբյանի գրառումը Երաժշտական դեգերումներ՝ Դանիել Երաժիշտի հետ Այն տարիները, որոնք անցկացրեցի կալանավայրում, ինձ օգնեցին մարդ տեսակին ճանաչելու ավելի խորը. Մովսես Նիկողոսյան Սբ. Հովհաննես Կարապետի ծննդյան տոն Ամեն ինչ խաղ է: Ես դուրս մնացի խաղից Մարդու իմաստությունը ինչո՞ւ Սուրբ Հոգին աղավնու կերպարանքով իջավ Էքզյուպերիի «Գիշերային թռիչք»-ը հայերեն թարգմանությամբ կներկայացվի ընթերցողին Նապաստակն ու դերձակները Պատրանք Հայկական գինու երեկո Մինսկում Կյանքը մահվան շեմին Մարդ Հույս «Թե մի ճյուղ ես անգիտակցաբար կոտրել՝ տասը ծառ տնկիր» Ցուցահանդեսում որպես Մոդիլիանիի աշխատանք ներկայացված 20 գեղանկար կեղծ է ճանաչվել Մեր Տեր եւ Փրկիչ Հիսուս Քրիստոսի անվանակոչությունը. հունվարի 13-ին Օպերային թատրոնը 2018-ի խաղաշրջանը կբացի փետրվարի 4-ին՝ «Անուշ» օպերայով Ես դրսում ո՛չ ապրելու, ո՛չ էլ բնակարան ձեռքբերելու նպատակ չունեմ. Ավետ Բարսեղյանը Հայաստանում նոր գործ է պատրաստում Ամերիկյան կինոակադեմիան ավարտել է «Օսկար»-ի թեկնածուների ընտրությունը Ինչու Ռուզան Վիթը չի վերադառնում թատրոն Արյան կանչը «Մեծապատիվ մուրացկաններ»․ ռեժիսորը և ժամանակը Հիսուսի անվան մասին
website by Sargssyan