Times.am | Օտարերկրացիները նախընտրում են Երևանի կոնսերվատորիան
USD
EUR
RUB

Օտարերկրացիները նախընտրում են Երևանի կոնսերվատորիան

 
 

Թեեւ կարող են կատարելագործվել նաեւ Եվրոպայում

Երեւանի Կոմիտասի անվան 95-ամյա պետական կոնսերվատորիան հայաստանյան մշակութային բուհերից առաջինն է, որտեղ սկսած 1960-ականներից՝ ուսանում են մեծաթիվ սփյուռքահայ եւ արտասահմանցի ուսանողներ: Կեսկատակ-կեսլուրջ ասում են, որ արտերկրյա ուսանողների աշխարհագրությունը ընդգրկում է բոլոր մայրցամաքները, բացի Անտարկտիդայից:

«Առավոտը» զրույցի հրավիրեց ուսանողների, որոնք այն երկրներից են, որտեղ դասական երաժշտարվեստը մեծ ժողովրդականություն չի վայելում: Մեր զրուցակիցները՝ Իրանի Իսլամական Հանրապետությունից Շահին Դանեշվարը եւ Լիբանանից Սեւան Ղարիբյանը, ուսանում են օպերային սիմֆոնիկ դիրիժորություն ճանաչված դիրիժոր, դոցենտ Ռուբեն Ասատրյանի ղեկավարությամբ: Շահին Դանեշվարն ասաց, որ Թեհրանի երաժշտական ուսումնարանում, որը շուրջ 60 տարվա պատմություն ունի, ուսանել է երեք բաժիններում՝ շեփորի, դաշնամուրի եւ խմբավարության: Նշեց, թե շեփորի դասախոսը իրանահայ Տիգրան Մնացականյանն էր, որը մասնագիտական կրթությունը ստացել է Ֆրանսիայում:

Հիշեց, որ ավարտական քննությանը հնչեցրել է Հարությունյանի շեփորի կոնցերտը: Շահինը ուսումը շարունակել է տեղի համալսարանի երաժշտական բաժնում, որն ունի շուրջ 20 տարվա պատմություն: Երաժիշտը կարճ ժամանակահատված որպես շեփորահար աշխատել է Թեհրանի սիմֆոնիկ նվագախմբում, դիրիժորներ Ռոհանի Սահբոյի եւ Լորիս Ճգնավորյանի ղեկավարությամբ: Ասաց, որ Իրանի կոմպոզիտորական արվեստի հիմնադիրը Ամինօլլահ Խոսեինն է, իրենց սիմֆոնիկ նվագախումբը ամսվա կտրվածքով երկու ելույթ է ունենում, հրավիրվում են բարձրակարգ երաժիշտներ, օրինակ՝ 4-5 ամիս առաջ Իրանի սիմֆոնիկը ղեկավարել է Ռիկարդո Մուտին: Չորս տարի է, ինչ Երեւանում է: Մինչ օպերային սիմֆոնիկ դիրիժորության դասարանում ուսանելը սովորել է դաշնամուրային եւ խմբավարական բաժիններում: «Վեց ամիս է՝ սովորում եմ Ռուբեն Ասատրյանի ղեկավարությամբ եւ արդեն հասցրել եմ, իհարկե՝ դաշնամուրի նվագակցությամբ, ղեկավարել Շուբերտի թիվ 8 եւ Բեթհովենի թիվ 3 սիմֆոնիաները»,- հայտնեց Շահինն ու հավելեց, թե լրիվ դասընթացն անցնելուց հետո մտադրություն ունի կատարելագործվել Փարիզի կոնսերվատորիայում: Կանխելով մեր հարցը, ասաց նաեւ, թե արվեստի ցանկացած ոլորտում մինչեւ երկրային կյանքի ավարտ անընդհատ սովորելու ու կատարելագործվելու տեղ կա:

Մեզ հասած տեղեկություններով՝ իրանցի երիտասարդը հեղինակ է «Արմենիա» TV-ով հեռարձակվող «Հետհաշվարկ» ֆիլմաշարի երաժշտության: Այս առիթով մեր զրուցակիցը նշեց, որ կոմպոզիտորական ոլորտում թեեւ ինքնուս է, բայց Իրանում հինգ ֆիլմի երաժշտության հեղինակ է: «Բոլոր ֆիլմերի համար գրված երաժշտությանս, այդ թվում՝ նաեւ հայկականի հենքը դասականն է: Հայտարարված էր մրցույթ եւ մոտ 40 հեղինակների թվում ընտրվեց իմ մեղեդին: Դեռեւս Թեհրանում հեղինակել եմ ստեղծագործություններ, որոնցից բեմում հնչել է կվարտետս եւ դաշնամուրի սոնատը՝ իմ մեկնաբանմամբ»,- հայտնեց Շահին Դանեշվարը:

Մեր մյուս զրուցակիցը՝ Սեւան Ղարիբյանը, ծնվել է Հայաստանում, 10 տարեկանում ընտանիքով տեղափոխվել են հոր ծննդավայրը՝ Լիբանան: Ասում է, որ երկու հայրենիք ունի՝ Հայաստանն ու Լիբանանը: Ուսանել է Համազգայինի «Բարսեղ Կանաչյան» քոլեջի ջութակի դասարանում, հետո Բախի անվան երաժշտական ինստիտուտում: «Լիբանանում շատ խիստ է եւ որակյալ՝ հանրակրթական ուսումը: Նույնիսկ մտածում էի շարունակել գիտության գծով, դառնալ աստղաֆիզիկոս կամ քիմիկոս… Բայց երաժշտությունը հաղթեց:

Նշեմ նաեւ, որ եթե չնվիրվեի երաժշտարվեստին, ապա բարձրագույն կրթություն կստանայի հենց Լիբանանում: Երեւանի կոնսերվատորիայում սովորում եմ նաեւ կոմպոզիտոր, պրոֆեսոր Վարդան Աճեմյանի դասարանում, հեղինակ եմ վոկալ-գործիքային, կամերային-անսամբլային գործերի, շուտով կփորձեմ նաեւ նվագախմբային ժանրում»,- հայտնեց մեր զրուցակիցը:

Սեւանը 2017թ. մասնակցել է հայաստանյան երիտասարդ կոմպոզիտորների փառատոնին եւ Գյումրիի «Վերածնունդ» մրցույթ-փառատոնին, որտեղ նրա՝ բարիտոնի եւ դաշնամուրի համար գրված «Ցոլք» ստեղծագործությունը՝ Բայրոնի խոսքերով, ճանաչվել է լավագույնը: Իսկ հպարտորեն էլ նշեց, իր խոսքերով՝ ընթացիկ ուսումնական տարուց դիրիժորական արվեստ ուսումնասիրել է զրոյից եւ արդեն դաշնամուրի ընկերակցությամբ ղեկավարել է Չայկովսկու Առաջին եւ Հայդընի Լոնդոնյան սիմֆոնիաները, ինչը մեծ առաջընթաց է: Մեր զրուցակիցը առանց մանրամասնելու ասաց նաեւ, որ ժամանակին մասնակցել է եվրոպական դասընթացների, որոնք ավելի շատ վարպետության դասընթացներ էին: Սա հիմնական պատճառն է, որ ընտրել է Երեւանում հիմնական եւ հիմնավոր գիտելիք ստանալու տարբերակը: Այդուհանդերձ, չի բացառվում կոնսերվատորիան ավարտելուց հետո մեկնի Եվրոպա՝ մասնագիտանալու ավելի նեղ մասնագիտությունների, օրինակ՝ էլեկտրաակուստիկ երաժշտության ասպարեզում:

Հետաքրքրվեցինք լիբանանյան դասական երաժշտության ոլորտից: «Գործում է երկու սիմֆոնիկ նվագախումբ: Առաջինը պրոպագանդում է զուտ դասական երաժշտություն, երկրորդը՝ միջինարեւելյան: Մի նվագախմբի հիմնադիրը Ուալիթ Ղոլմիեն է, մյուսինը՝ Լիբանանի ֆիլհարմոնիկ նվագախմբինը՝ հայաստանցի հանդիսատեսին ծանոթ Հարություն Ղազարյանը: Ասեմ, որ այնտեղ նվագախմբերը յուրաքանչյուր շաբաթ ունենում են մեկ-երկու համերգ, որոնց մուտքը ազատ է, - տեղեկացրեց Սեւանը, հետո էլ հավելեց, - Լիբանանն այն երկիրն է, որտեղ տարբեր տենդենցներ գալիս ու գնում են: Վերջին շրջանում ավելի շատ մոդայիկ է հաճախել դասական երաժշտության համերգներ:

Հետեւաբար մրցակցությունը մեծ է: Ասեմ նաեւ, որ հայաստանցի երաժիշտների ներդրումը զգալի է հիմնականում մանկավարժության ոլորտում»:

ՍԱՄՎԵԼ ԴԱՆԻԵԼՅԱՆ

Լրահոս
Միքայել Պողոսյան․ Խոսքեր Պարույր Սևակին Ինձանից այնքան ես բացակա եղել Ջրերի վրայով քայլողը Ծառատակի խնձորը նոր ջրհեղեղ է… «Շնորհակալություն մեր երջանիկ մանկության համար». «Սոյուզմուլտֆիլմ»-ը 2 հոլովակ է հրապարակել՝ նվիրված մանկագիր Ուսպենսկիի հիշատակին Հարվածել Եկեղեցուն կնշանակի վերացնել այլասերման տարածման հիմնական արգելքը. Արշակ եպիսկոպոս Խաչատրյան Հենրիկ Էդոյան․ Հենման կետ Տիգրան Համասյան․ Նոր ծաղիկ Ամբոխները խելագարված Բրիտանացի երաժիշտները տեսահոլովակ են նկարահանել Չեռնոբիլում Սուրբ Սուրբ Մի մոռացեք ձեր խիղճը Խոհեմ եղիր և ընտրիր չափավոր կյանքը. Ս. Հովհան Ոսկեբերան Հայրապետ Գուգարաց թեմում վերաօծվեց Քարինջի Սուրբ Կարապետ եկեղեցին Լրատվամիջոցներն անդրադարձել են փոստատար Պեչկինի էկրանային կերպարի հայազգի ստեղծողին Լիլիթ Սողոմոնյանն առաջին հայուհին է՝ Չիլիի օպերային թատրոնում Նիկոլայ Նիկողոսյանը հայ և համաշխարհային կերպարվեստի երախտավորներից էր, որի ստեղծագործությունները գրանցվել են համաշխարհային արվեստի տարեգրության ոսկե մատյանում «Տիրոջ առաջ պատվական երեք գործ կա» 76 տարեկանում կյանքից հեռացել է «սոուլի թագուհի» Արետա Ֆրանկլինը ԿԳ նախարարը կատակեց. «Մնում է որոշել, թե մեզանից ով է մնում նախարար» Գունավոր մատիտներ Սոնայի հոգսը Բարի այգեպանը Քսենյա Կիրիլովան՝ լրտեսության, «սառը պատերազմի» եւ չիրականացած հնարավորությունների մասին «EPIC EYE» խորագրով փառատոնը ներկայացուցիչներ կունենա Գերմանիայից, Ֆրանսիայից, Բրիտանիայից «Թիկնոցը» և «Պայացներ». համերգային կատարումներ՝ հայ և օտարազգի մենակատարների մասնակցությամբ Հայ պոեզիայի ամենաինքնատիպ դեմքերից մեկի՝ Սիամանթոյի ծննդյան օրն է Գառնուկը Հայկուհու պարը Խաղաղական ժամերգութիւն Անպատասխան Հաղթահարել փորձությունները Նահապետ Քուչակ. Հայրեններ Հավատալ հասկանալու համար «Սոուլի թագուհի» Արետա Ֆրանկլինը մահամերձ է 1 վայրկյանում՝ 10,3 վանկ. Էմինեմը գերազանցել է ռեփ կարդալու սեփական ռեկորդը Ավստրալիայում 457 երաժիշտ միաժամանակ նվագել է Highway to Hell-ը Հարություն Խաչատրյանը նախագահում է «Պատուհան դեպի Եվրոպա» կինոփառատոնի «Կոպրոդուկցիա» ծրագրի ժյուրին Բաց փակուղի
website by Sargssyan