Թող ուրիշն անի
Նմանատիպ
Ճանապարհով անցնում էր երեք մարդ: Քամի է սկսվում, բուք ու բորան: Եղանակը վատանում է, իսկ մինչև ամենամոտիկ գյուղը դեռ ահագին ճանապարհ կար: Ի՞նչ անեին:
Ճամփորդները որոշում են մտնել մի հին տաճար, սպասել մինչև եղանակը հանդարտվի:
Սակայն գնալով բուքը սաստկանում է ու ճամփորդները սրտից կսառչեին, եթե մի ճար չգտնեին:
– Ի՞նչ ցուրտ է, դիմանալ չի լինում,- ասում է առաջինը:
– Ձեռքերս ու ոտքերս փայտացել են,- ասում է երկրորդը:
– Եթե այսպես շարունակվի մենք բոլորովին կսառչենք,- ասում է երրորդը:
Ցրտից պաշտպանվելու համար այս մարդիկ կարո՞ ղ էին փայտ ու ցախ հավաքել ու կրակ անել: Կարող էին չէ՞: Բայց …
– Եթե մի քիչ փայտ բերվի, կրակ կանենք, կտաքանանք:
– Այո, շատ լավ կլիներ,- ասում է երկրորդ ճամփորդը:
– Այո, եթե փայտ բերվեր, գիշերը այստեղ կանցկացնեինք,- ասում է երրորդ ճամփորդը:
Երեքն էլ խոսում են փայտի մասին, բայց ոչ ոք տեղից չի շարժվում:
Իսկ սառնամանիքը գնալով սաստկանում էր: Այդ ժամանակ նրանցից մեկը դիմում է մյուսին.
– Գնա փայտի, ես կգնայի, բայց ոտքերս ցավում են, չեմ կարող:
Իսկ այս մեկն էլ ասում է երրորդին.
– Փորս շատ է ցավում, դու գնա փայտի:
Իսկ այս մեկն էլ մյուսին է ասում.
– Ավելի լավ է դու գնաս, գլուխս պտտվում է, հազիվ եմ ոտքի վրա կանգնած մնում:
Իհարկե, նրանք հիվանդ չէին, նրանց ոչ մի տեղն էլ չէր ցավում, պարզապես յուրաքանչյուրը մտածում էր, որ փայտ բերել ու կրակ անելը իր գործը չի, այլ մեկ ուրիշի:
Հենց այդպես էլ իրենք էին մտածում. «Ես հո իրենց ծառան չեմ, թող իրենք փայտը բերեն, իսկ ես կտաքանամ»:
Նրանք առանձին-առանձին նույն բանն էին մտածում, իսկ եղանակը գնալով վատանում էր, սառնամանիքը սաստկանում էր: Իսկ ճամփորդները շարունակում էին սառչել, բայց ոչ մեկը տեղից չէր շարժվում…
Աղբյուր՝ heqiat.am։
Հետևեք մեզ նաև Telegram-ում