Փաստաբանի խորհուրդը
Նմանատիպ
Մի քաղաքում ապրելիս է լինում մի մարդ՝ Ճարպիկ մականունով: Նրան այդպես են անվանում այն պատճառով, որ սիրում է խարդախություն անել ու իր ծուղակը գցել ազնիվ մարդկանց: Ահա մի անգամ այս Ճարպիկ մականունով մարդը կարողանում է իր կովը միանգամից ծախել յոթ մսագործի ու բոլորից կանխավճար ստանալ: Մի օր էլ նրանք ամբողջ խմբով գալիս են իրենց ապրանքի ետևից ու տեսնում, որ ընդամենը մի կով է: Ո՞ր մեկը վերցներ: Մսագործները զայրանում են ու աղմուկ բարձրացնում և Ճարպիկին դատի են տալիս: Այստեղ խաբեբա Ճարպիկը սկսում է մտածել, թե ինչպես պրծնի դատ ու դատաստանից: Մտածում է, մտածում, քիչ է մնում գլուխը պայթի, բայց ոչ մի ելք չի գտնում: Եվ ահա նրան կանչում են դատարան: Ճարպիկը թափառում է փողոցում ու շարունակ շուրջը նայում, ասես օգնություն է փնտրում: Պատուհանից մի փաստաբան տեսնում է նրան: Իսկ այս փաստաբանը Ճարպիկից ավելի խորամանկն է լինում:
– Ի՞ նչ է պատահել քեզ, տեսնում եմ, որ վիշտ ունես: Գուցե ես կարող եմ քեզ օգնել,- կանչում է փաստաբանը:
Եվ այստեղ Ճարպիկը պատմում է իր կատարած խարդախության և մսագործների դատի մասին: Փաստաբանը խոստանում է օգնել Ճարպիկին: Նա տալիս է մի այսպիսի խորհուրդ.
– Հենց որ մտնես դատարան, քեզ ամեն տեսակ հարցեր կտան: Դու միայն մի բան պատասխանիր. «Է՜, ձեռ քաշեք»: Եվ այլևս ուրիշ ոչ մի բառ մի ասա: Հասկացա՞ր:
Ճարպիկը դուրս է գալիս փաստաբանի մոտից: Եվ որոշում են, որ դատից հետո Ճարպիկը վարձահատույց պիտի լինի փաստաբանին: Խաբեբա Ճարպիկը գալիս է դատարան:
Դատավորը նրան հարցնում է.
-Ճիշտ է, որ դու կովը միանգամից յոթ մսավաճառի ես վաճառել:
Ճարպիկը պատասխանում է.
– Է՜, ձեռ քաշեք:
Այսինքն՝ է՜, հավես չունեմ ձեր հարցերին պատասխանել:
Դատավորը նորից է նրան հարցնում.
– Դու կարգին պատասխանիր, կովը ծախե՞լ ես, թե ոչ:
Իսկ Ճարպիկը իրենն է պնդում.
-Է՜, ձեռ քաշեք:
Այստեղ դատավորը համբերությունից դուրս է գալիս: Խեցգետնի նման կարմրում է ու կռանում Ճարպիկի ականջին և գոռալով տալիս նույն հարցը:
Իսկ Ճարպիկը պատասխանում է.
– Է՜, ձեռ քաշեք:
Չարչարվում են, չարչարվում ու ոչ մի կարգին խոսք չեն լսում նրանից: Այդ ժամանակ դատավորն ասում է գանգատավորներին.
– Բարի մարդիկ, ես չեմ կարողանում այս գործից գլուխ հանել: Ինքներդ էլ տեսնում եք, որ այս մարդը նորմալ չի: Ստիպված ենք նրան բաց թողնել:
Եվ շուռ է գալիս դեպի Ճարպիկն ու ասում.
– Գնա տուն, դու ազատ ես:
Իսկ Ճարպիկը նորից իրենն է ասում.
– Է՜, ձեռ քաշեք,- և տեղից չի շարժվում:
Ծառաները բռնում են նրա վզակոթից ու դուրս շպրտում: Ճարպիկը ծիծաղում է ու գնում տուն: Իսկ փաստաբանը պատուհանի առաջ կանգնած նրան էր սպասում՝ վարձը ստանալու: Բայց տեսնում է, որ Ճարպիկը դուրս է գալիս դատարանից ու իսկի նրա մտքով չի էլ անցնում իր տուն մտնել: Այդ ժամանակ փաստաբանը դուրս է թռչում փողոց ու բղավում:
– Է՜յ, սպասի՛ր, սպասի՛ր: Տուր իմ փողը:
– Է՜, ձեռ քաշիր:
Այսպես է պատասխանում Ճարպիկը ու շարունակում իր ճանապարհը:
Աղբյուր՝ heqiat.am։
Հետևեք մեզ նաև Telegram-ում