Times.am | «Արվեստագետները ոչ թե հեռանում են այլ մեկնում՝ վերադառնալու պայմանով»
USD
EUR
RUB

«Արվեստագետները ոչ թե հեռանում են այլ մեկնում՝ վերադառնալու պայմանով»

 
 

Դիանա Ադամյանը փայլել է Մենուհինի անվան ջութակահարների մրցույթում

Հայաստանյան թավշյա հեղափոխության օրերին «Առավոտը» արվեստագետներից, մասնավորապես՝ երաժիշտներից, նույնիսկ հորդորներ էր ստանում, թե ինչու լուր չկա աշխարհի ամենահեղինակավոր՝ Մենուհինի անվան ջութակահարների մրցույթում Երեւանի Կոմիտասի անվան պետական կոնսերվատորիայի առաջին կուրսի ուսանողուհի Դիանա Ադամյանի (պրոֆեսոր Էդուարդ Թադեւոսյանի դասարան) հաղթանակի առիթով:

Ի դեպ, մինչ Շվեյցարիա մեկնելը Էդուարդ Թոփչյանի ղեկավարությամբ Հայաստանի ազգային ֆիլհարմոնիկ նվագախմբի ընկերակցությամբ ջութակահարուհու ելույթից առաջ զրուցել ենք նրա հետ («Առավոտ», 16.02.2018թ.): Շվեյցարիայի մայրաքաղաքում կայացած մրցույթից անմիջապես հետո ջութակահարուհու հաղթանակի մասին տեղեկացրել ենք մի քանի անգամ՝ Երեւանի Կոմիտասի անվան պետական կոնսերվատորիայի ռեկտոր, պրոֆեսոր Շահեն Շահինյանի, «Կոմիտաս» քառյակի առաջին ջութակ Էդուարդ Թադեւոսյանի, Համահայկական նվագախմբի առիթով հայրենիք ժամանած թավջութակահար Սեւակ Ավանեսյանի, ջութակահար Արմեն Մովսեսյանի եւ հիշյալ մրցույթում 12 տարի առաջ դարձյալ այս մրցույթում հաղթանակ տարած բելգիաբնակ ջութակահար Հրաչյա Ավանեսյանի հետ զրույցներում:

1983թ. հիմնված, 2 տարին մեկ տարբեր երկրներում, այս տարի 18-րդ անգամ անցկացվող մրցույթում «մրցում» են երկու տարիքային խմբերի (11-15 եւ 16-22) ջութակահարներ:

Դիանա Ադամյանը մեզ հետ զրույցում հայտնեց, որ մինչ մասնակցությունը մրցույթի կազմկոմիտեին իրենց ձայնագրություններն են ուղարկել մոտ 320 երաժիշտ, որից ժյուրին՝ ամերիկացի ճանաչված ջութակահարուհի Պամելա Ֆրանկի նախագահությամբ, ընտրել է 44-ը՝ շուրջ 20 երկրից: Պարտադիր ծրագրում ջութակահարը պետք է ներկայացներ Բախի, Մոցարտի, Պագանինիի, Կրեյսլերի, Բեթհովենի ստեղծագործություններից եւ Յայիր Քլարթագի ստեղծագործությունը՝ գրված հատուկ մրցույթի համար:

Հետաքրքրությանը, թե մրցույթում հաղթանակը իր տաղանդի, աշխատասիրության, Չայկովսկու անվան երաժշտական դպրոցում անվանի մանկավարժ Պյոտր Հայկազյանի, կոնսերվատորիայում Էդուարդ Թադեւոսյանի դասարանում ուսանելու արդյունք էր, մեր զրուցակիցը պատասխանեց. «Հնչեցրած անուններին ես կգումարեի նաեւ ժամանակին անվանի ջութակահարներ Լեոնիդաս Կավակոսի, Անա Չումաչենկոյի, Պինկա Ցուկերմանի անունները, որոնց ղեկավարությամբ վարպետության դասընթացների եմ մասնակցել, ինչպես նաեւ 2012 թվականից պրոդյուսերիս՝ Հայաստանի ազգային ֆիլհարմոնիկ նվագախմբի գլխավոր պրոդյուսեր Արման Պադարյանին: Եվ, բնականաբար, երաժշտական ընտանիքիս՝ ջութակահարներ հորս՝ Հակոբ Ադամյանի, մորս՝ Նունե Անտաշյանի հաղթանակն է»:

Դիտարկմանը՝ սովորաբար մրցույթներում, այն էլ նման հեղինակավոր, ներկա են լինում պրոդյուսերներ, ճանաչված երաժիշտներ, որոնք մանավանդ դափնեկիրներին համագործակցության առաջարկ են անում, այս առիթով արվեստագետը փաստեց, թե մրցույթի պայմաններից մեկն էլ հաղթողին ժամանակավոր օգտագործման համար ջութակի վարպետ Քրիստոֆ Լանդոնի հավաքածուից Նիկոլա Գալիանոյի ջութակի տրամադրումն է, երրորդ փուլում ելույթ է ունեցել Լոնդոնի թագավորական նվագախմբի ընկերակցությամբ, ջութակահար եւ դիրիժոր Յուլիան Ռախլինի ղեկավարությամբ, հետո ասաց. «Իհարկե, առաջարկներ ստացել եմ, օրինակ՝ 2019թ. դարձյալ կհամագործակցեմ Լոնդոնի թագավորական նվագախմբի հետ, 2020թ. հյուրախաղերի առաջարկներ կան Ֆրանսիա, Գերմանիա, Շվեյցարիա: «Երեւանյան հեռանկարներ» միջազգային փառատոնի մենեջեր Սոնա Հովհաննիսյանից տվյալներս է խնդրել հեղինակավոր Harrison Parrott պրոդյուսերական կազմակերպության ներկայացուցիչ Ջասպեր Փերոթը եւ այլն»: Իսկ թե ինքն էլ կհետեւի՞ հեղինակավոր մրցույթներում հաղթած համերկրացիների օրինակին ու կհիմնվի եւ ստեղծագործական գործունեությունը կշարունակի արտասահմանյան որեւէ երկրում, երիտասարդ արվեստագետը պատասխանեց. «Ձեռք բերածով պետք չէ բավարարվել: Ի վերջո արվեստագետները, մանավանդ երիտասարդ, ոչ թե հեռանում են հայրենիքից, այլ մեկնում՝ վերադառնալու պայմանով, ինչը ես համարում եմ նույնիսկ պարտադիր՝ փորձի փոխանակման, կարճ ասած՝ աշխարհից ինֆորմացիա ստանալու համար: Այս տարի կմեկնեմ Մյունխեն՝ ուսումս շարունակելու Անա Չումաչենկոյի ղեկավարությամբ…»:

Զրույցի ընթացքում Դիանա Ադամյանը հավաստիացրեց, որ իրեն տարբեր հարցեր էին ուղղվում այդ օրերին մեր երկրում կատարվող դեպքերի մասին. «Բոլորը հիացմունքով էին խոսում հայաստանյան թավշյա հեղափոխության մասին, հատկապես նշելով սերնդակիցներիս մասնակցությունը, ինչի առիթով հպարտություն էի ապրում…»:

ՍԱՄՎԵԼ ԴԱՆԻԵԼՅԱՆ

Լրահոս
Ո՞ւր, հոգիս Բոլոր խնդիրները ձեր հաղորդագրության մեջ չեն տեղավորվի. «Ծիրանի ծառ» փառատոնի տնօրեն ԱՄԵՆԱՅՆ ՀԱՅՈՑ ԿԱԹՈՂԻԿՈՍՈՒԹՅԱՆ ԹԵՄԱԿԱՆ ԿԱՌՈՒՑՎԱԾՔԸ 1995-2018 ԹԹ. Ի՞նչ է նշանակում Հաղորդություն «Քրիստոնյա Հայաստան» երկշաբաթաթերթը լույս է ընծայել բացառիկ՝ նվիրված Հայաստանի առաջին Հանրապետության և Սարդարապատի հերոսամարտի 100-ամյակներին Հայտնի հայազգի գործարարի թանգարանն անվանել են Պորտուգալիայի լավագույն մշակութային կենտրոնը Ստեղծվել է Երևանի հիմնադրման 2800-ամյակին նվիրված միջոցառումները նախապատրաստող հանձնաժողով Միքայել Պողոսյան․ Խոսքեր Պարույր Սևակին Ինձանից այնքան ես բացակա եղել Ջրերի վրայով քայլողը Ծառատակի խնձորը նոր ջրհեղեղ է… «Շնորհակալություն մեր երջանիկ մանկության համար». «Սոյուզմուլտֆիլմ»-ը 2 հոլովակ է հրապարակել՝ նվիրված մանկագիր Ուսպենսկիի հիշատակին Հարվածել Եկեղեցուն կնշանակի վերացնել այլասերման տարածման հիմնական արգելքը. Արշակ եպիսկոպոս Խաչատրյան Հենրիկ Էդոյան․ Հենման կետ Տիգրան Համասյան․ Նոր ծաղիկ Ամբոխները խելագարված Բրիտանացի երաժիշտները տեսահոլովակ են նկարահանել Չեռնոբիլում Սուրբ Սուրբ Մի մոռացեք ձեր խիղճը Խոհեմ եղիր և ընտրիր չափավոր կյանքը. Ս. Հովհան Ոսկեբերան Հայրապետ Գուգարաց թեմում վերաօծվեց Քարինջի Սուրբ Կարապետ եկեղեցին Լրատվամիջոցներն անդրադարձել են փոստատար Պեչկինի էկրանային կերպարի հայազգի ստեղծողին Լիլիթ Սողոմոնյանն առաջին հայուհին է՝ Չիլիի օպերային թատրոնում Նիկոլայ Նիկողոսյանը հայ և համաշխարհային կերպարվեստի երախտավորներից էր, որի ստեղծագործությունները գրանցվել են համաշխարհային արվեստի տարեգրության ոսկե մատյանում «Տիրոջ առաջ պատվական երեք գործ կա» 76 տարեկանում կյանքից հեռացել է «սոուլի թագուհի» Արետա Ֆրանկլինը ԿԳ նախարարը կատակեց. «Մնում է որոշել, թե մեզանից ով է մնում նախարար» Գունավոր մատիտներ Սոնայի հոգսը Բարի այգեպանը Քսենյա Կիրիլովան՝ լրտեսության, «սառը պատերազմի» եւ չիրականացած հնարավորությունների մասին «EPIC EYE» խորագրով փառատոնը ներկայացուցիչներ կունենա Գերմանիայից, Ֆրանսիայից, Բրիտանիայից «Թիկնոցը» և «Պայացներ». համերգային կատարումներ՝ հայ և օտարազգի մենակատարների մասնակցությամբ Հայ պոեզիայի ամենաինքնատիպ դեմքերից մեկի՝ Սիամանթոյի ծննդյան օրն է Գառնուկը Հայկուհու պարը Խաղաղական ժամերգութիւն Անպատասխան Հաղթահարել փորձությունները
Ամենաընթերցված
website by Sargssyan