Արծիվը
19/05/2018 12:20
Նմանատիպ
Արծիվը տերն էր լեռան գագաթին,
Բայց ժամն էր եկել մահվան շքերթի:
Իր ապրած կյանքը նա իմի բերեց,
Ինքն իրեն հարցրեց ու պատասխանեց:
– Ես ի՞նչ արեցի այս հիսուն տարում,
Փառավոր ապրած իմ այս աշխարհում,
– Անվախ ես թռա դաշտ, լեռ ու քարայր
Հիսուն ձագերի դարձա արժան հայր:
Երբեք չեմ սիրել բիրտ շողոքորթին,
Նրան պատժել եմ անձամբ իմ հերթին
Այսօր հոգնել եմ, ուժերս վատնել
Բայց ամբողջ կյանքում մեկին չեմ մատնել:
Սիրեցի կյանքի ոճն իմ արծվական,
Ինձ անվանում են արծիվ հայկական
Եվ ես հպարտ եմ իմ հին անցյալով,
Այսօր իմ վերջն է, չեմ մեռնի լալով:
– Մեկ անգամ կրկին լեռան ծայր թռավ,
Մեջն էլ ուժ չկար, բայց մի կերպ հասավ,
Նա վերջին անգամ զիլ ձայնով կանչեց
Եվ լեռան արքան շատ հպարտ հանգչեց:
Գագիկ ՓԱՐՎԱՆՅԱՆ
Աղբյուր՝ heqiat.am։