USD
EUR
RUB

Ֆրանսահայ ռեժիսոր. «Ծնված լինելով Ֆրանսիայում՝ ես խորապես կապված եմ Հայաստանի հետ»

 

Ֆրանսահայ կինոռեժիսոր Առնո Խայաջանյանի վերջին ֆիլմը, որ կոչվում է «Մենք ենք, մեր սարերը», պատմում է Արցախի մասին: Այն ընդգրկված էր «Ոսկե ծիրանի» «Հայկական համայնապատկեր» ծրագրում: Հոբելյանական «Ոսկե ծիրանին» Առնո Խայաջանյանը ճանաչվեց լավագույն սփյուռքահայ կինոգործիչ իր նշյալ ֆիլմով:

«Առավոտը» ռեժիսորից հետաքրքրվեց, թե իր համար ինչ նշանակություն ունի իր այդ պարգեւը: Առնո Խայաջանյանը հիշեցրեց, որ 2016-ին իր նախորդ աշխատանքը լավագույն վավերագրական ֆիլմ է ճանաչվել, ինչ վերաբերում է «Մենք ենք, մեր սարերը» աշխատանքին, ռեժիսորի ձեւակերպմամբ, այն յուրահատուկ է, քանի որ իր առաջին հայալեզու ֆիլմն է: Ինքը անչափ հպարտ է, սակայն դա միայն իր անձնական հաղթանակը չի համարում, քանի որ այդ հաղթանակը նաեւ Արցախինն ու նրա ժողովրդինն է:

Հետաքրքրվեցինք, թե ինչու որոշեց հենց Արցախի մասին ֆիլմ նկարել, Առնոն պատասխանեց. «2016-ին ես հրավիրվել էի Ստեփանակերտ իմ նախորդ ֆիլմի ցուցադրության առիթով: Արցախյան այցս ինձ համար հայտնություն էր ինչպես անձնական, այնպես էլ գեղարվեստական առումով: Ես տառացիորեն տեղափոխվեցի ոգու ու լանդշաֆտի գեղեցկություն, ծանոթացա քաջ ու լավատես մարդկանց հետ: Ուստի որոշեցի վավերագրական ֆիլմ նկարել՝ Արցախը ժամանակակից եւ դրական իմիջով ներկայացնելու համար: Ֆիլմի հիմնական լսարանը միջազգային հանդիսատեսն է: Ես ցանկանում եմ ցույց տալ, որ քաղաքական կոնֆլիկտի հետեւում մարդիկ են, որոնք փնտրում են սեր, ազատություն եւ խաղաղություն…»:

Մեր զրույցի ընթացքում անդրադարձ եղավ «Մենք ենք, մեր սարերը» ֆիլմի` Ֆրանսիայի մի շարք քաղաքներում ցուցադրվելուն: Կինոռեժիսորը հայտնեց, որ Ֆրանսիայում մարդիկ տեղյակ չեն Արցախի մասին, բայց նաեւ փաստեց, որ անակնկալի է եկել թեմայի վերաբերյալ նրանց հետաքրքրությունից: Նշեց, որ ֆրանսիացիները տպավորված էին արցախյան կերպարներով ու բնապատկերներով: Նրա խոսքերով, Արցախում մարդիկ խելացի են, համարձակ ու անչափ թանկ իր համար:

Առնո Խայաջանյանին հարցրինք, թե ինչպիսի՞ն կլինի իր հաջորդ նախագիծը, ի՞նչ է ծրագրել նկարահանել առաջիկայում: «Արցախի մասին իմ նոր նախագիծը խաղարկային ֆիլմ է, այն կլինի դրամա` հայ դերասանների մասնակցությամբ»,- հայտնեց ռեժիսորը: Ապա հավելեց, որ նկարահանումները կսկսեն 2019-ի սեպտեմբերին, ֆիլմը հայ-ֆրանսիական համատեղ արտադրություն կլինի: Իր պրոդյուսերներն են Սերժ Ավեդիքյանը, Միքայել Դովլաթյանը եւ Մարտին Սալմոնը: Ֆիլմում պատմվելու են ունիվերսալ պատմություններ, գործողությունները տեղի են ունենալու Արցախում: Պատմության հիմքում կլինի արցախյան հակամարտությունը: Ես ավելի շատ կկենտրոնանամ առօրյա կյանքի, մարդկանց զգացմունքների, երազանքների ու փոխհարաբերությունների վրա: Դա նման կլինի յուրատեսակ խճանկարի, որտեղ կխաչաձեւեն ութ կերպարների պատմությունները»,-պատասխանեց մեր զրուցակիցը:

Առնո Խայաջանյանին հարցրինք, թե բացի հայկական ազգանունից, էլ ի՞նչն է իրեն կապում Հայաստանի հետ:

«Որպես հայկական ծագմամբ ֆրանսիացի ռեժիսոր, կարծում եմ` ինձ ճակատագրով վիճակված է ուսումնասիրել, հարգել ու գնահատել իմ արմատները: Ամերիկացի գրող Ֆիլիպ Ռոթն ասել է. «Ողջ մնալու համար պետք է հիշողություններ թողնես», իսկ Պիեռ Պաոլո Պազոլինին մի առիթով նշել է. «Պատմությունը իրենց հայրերին հասկացող որդիների ուշադրությունն է»: Ես լիովին համաձայն եմ այս մեջբերումների հետ: Նաեւ կարծում եմ, որ շատ կարեւոր է բարձրաձայնել Հայաստանի ընթացիկ, արդիական խնդիրների ու թեմաների մասին, ինչպիսիք են, օրինակ, վերջերս տեղի ունեցած հեղափոխությունը, կանանց առաջադիմությունը, երիտասարդների ստեղծարարությունը… Անգամ ծնված լինելով Ֆրանսիայում՝ ես խորապես կապված եմ Հայաստանի ու հայ ժողովրդի հետ: Որպեսզի հասկանամ, թե ով եմ ես, պետք է հասկանամ, թե որտեղից եմ սերում»,-ասաց ֆրանսահայ ռեժիսորը:

Հավելենք, որ Առնո Խայաջանյանը 2012-ին նկարահանել է «Կորուսյալ հորիզոններ» կարճամետրաժ ֆիլմը, որը ցուցադրվել է 22 միջազգային կինոփառատոներում, լավագույն դերակատարման համար մրցանակ բերել Մըլուզում, իսկ լավագույն ֆիլմի համար՝ Ֆենասյեի կինոփառատոնում: 2014-ին Խայաջանյանը կարճամետրաժ ֆիլմի է վերածել Լորա Դեպրենի ֆրանսիական պիեսը: «Վատ աղջիկը» ներկայացվել է 23 միջազգային կինոփառատոներում՝ նվաճելով Vimeo-ի եւ Ժյուրիի մրցանակները Sundance հեռուստաալիքի մրցույթում: 2015-ին Խայաջանյանը ասպարեզ է հանել իր հայ նախապապերի պատմությունից ոգեշնչված «Քարքարոտ ճամփաներ» վավերագրական աշխատանքը, որն արժանացել է ֆրանսիացի քննադատների գնահատանքին եւ մասնակցել 24 կինոփառատոնի, շահել Իսմայիլիայի (Եգիպտոս) կինոփառատոնի Ժյուրիի մրցանակը, փառատոնում լավագույն վավերագրական ֆիլմ ճանաչվել: 2017-ին ARTE ալիքով ցուցադրվել է Խայաջանյանի «Խուլ սրտեր» նոր ֆիլմը:

Առնո Խայաջանյանը նկարել է հետեւյալ ֆիլմերը՝ «Կորուսյալ հորիզոններ (2012), «Վատ աղջիկը» (2014), «Քարքարոտ ճամփաներ» (2015), «Մենք ենք, մեր սարերը» (2017), «Խուլ սրտեր» (2017):

ԳՈՀԱՐ ՀԱԿՈԲՅԱՆ
Աղբյուր՝ Aravot.am:

Լրահոս
Մեդիալաբը ձեռնարկում է հանրային ֆինասավորման արշավ Նայեաց սիրով Ձեռագործ աշխատանքների ցուցահանդես Չարենցի տուն-թանգարանում Աննամակ ծրար․ Պարույր Սևակ Սերը և բաժանումը Ավետիք Իսահակյան․ Մայրիկ ՅՈՒՆԵՍԿՕ-ն՝ Սուրբ Սոֆիա տաճարի կարգավիճակի փոփոխության Էրդողանի մտադրության մասին Ամենայն Հայոց Կաթողիկոսն ընդունեց Հայկական Բարեգործական Ընդհանուր Միության նախագահին «Հայտնի չէ՝ եկեղեցիների վերականգնումը օգու՞տ է բերում որմնանկարներին, թե՞ վնաս» Արվեստի վերածված սուրճն ու կակաոն Նոր նշանակումներ «Մեծ լուսատուն` ցերեկը իշխելու համար, իսկ փոքր լուսատուն` գիշերը իշխելու համար» «Սա Բեռնհարդ Շլինկի տեսակետն է Հոլոքոստի մասին, որը նա մեծ վարպետությամբ գրականություն է դարձրել» Ինչո՞ւ Իրանում հետաքրքրվեցին «Բանկ Օտոմանով» 30 տարի անց «Քամին ունայնության» ֆիլմը վերադարձավ կինոյի տուն ՀԱՊ-ում բացվելու է Անատոլի Գրիգորյանի ստեղծագործությունների ցուցահանդեսը Վախթանգ Անանյան․ ՈՒշացած խոստովանություն Դավիթ Սամվելյան․ Լեռան տակի քարոզ Հայկական ավանդական երաժշտությունը և մշակութային անվտանգության հիմնահարցը. Ալեքսանդր Սահակյան Ամենայն Հայոց Կաթողիկոսը հանդիպում ունեցավ վերապատրաստման դասընթացների մասնակիցների հետ Հայաստանը մասնակցում է Հնագույն քաղաքակրթությունների ֆորումին Վարդան Հակոբյան․ Անվերադարձ աչքեր Դավիթ Հովհաննես․ Մեզանից հետո ուժեղ ու հաղթանդամ․․․ Զքէն խորհեցան Ավ. Իսահակյանի անվան գրադարանը «կտարածվի» Քրիստոնեական ներողամտության մասին Տնտեսի կիրակի (Մեծ պահքի չորրորդ կիրակի) Նանե․ Դու… կանգուն մնա… Վահան Թոթովենց․ Ես ծաղիկ չունիմ… Ամենայն Հայոց Կաթողիկոսն ընդունեց Տավուշի նորանշանակ մարզպետին Մարտի 21-ին Գառնիում ծիսական արարողություն և տոնախմբություն է Վարանդի «Բերդաքաղաքի» ձեռագիրը կարդալուց անմիջապես հետո և մեկ տարի անց «Հայաստանի պետական սիմֆոնիկ նվագախումբը ֆանտաստիկ կոլեկտիվ է». Կարմինե Լաուրի Բուենոս Այրեսում Հայոց ցեղասպանությանը նվիրված թանգարան կկառուցվի Ասել՝ սերիալներն այն չարիքն են, որ կործանում են մեզ և մեր երկիրը, մեծագույն սխալ է. Հրաչ Քեշիշյան Խարիկ Դաշտենց․ Լեռան ծաղիկները Մետաքսե․ Հուշերի մորմոք Աղոթքը հոգու շնչառություն է Այսօր կանգնեցաւ աւազան Մանսուրյան. Մեր երաժշտության մեջ բաց կար՝ բարձրագույն պոեզիան երգելու առումով
website by Sargssyan