USD
EUR
RUB

Հաճախ շրջագայող հայ լուսանկարիչը «հյուրախաղերի» է մեկնում այն երկիր, որը գնահատում է լուսանկարչական արվեստը

 
 

Հայաստանում լուսանկարչական արվեստը հիմնականում լուսանցքում է հայտնվել, եթե այլ ոլորտներին պետությունն այս կամ այն չափով աջակցում է, ապա լուսանկարչությունը գրեթե ինքնուրույն է գործում: Մեզանում ոչ հաճախ, բայց, այնուամենայնիվ, կազմակերպվում են լուսանկարիչների աշխատանքների ցուցադրություններ: Չմոռանանք նշել հայտնի լուսանկարիչ Վահան Քոչարի 2007թ. ներկայացրած «Հայ լուսանկարիչներ» պատկերագիրքը, որը մշակույթի մարդկանց գնահատմամբ՝ գրեթե ամբողջական հանրագիտարան է Հայաստանի եւ Սփյուռքի լուսանկարչական ժառանգության: Գրքում տեղ գտած 180 անուններ հեղինակի կողմից են «հայտնաբերվել» ու ներկայացվել: Թվարկենք մի քանի անուններ, որոնց արվեստը ստացել է համաշխարհային հռչակ՝ կանադահայ Յուսուֆ Քարշ, Արթո Գավուք, պոլսահայ Արա Գյուլլեր, ամերիկահայ Հարրի Քունդակչյան եւ ուրիշներ:

Մասնագիտական նեղ շրջանակներում հայտնի է լուսանկարիչ, գրաֆիկ դիզայներ Տաթեւ Մնացականյանի անունը, որի մասին խոսելիս հաճախ ասում են՝ «տարին տասներկու ամիս ճամփորդում է, դրսում ավելի շատ է ցուցադրվում, քան ներսում»: Ասում են նաեւ, թե Վահան Քոչարը մի առիթով զուգահեռներ է տարել այս արվեստագետի եւ հանրահայտ Իդա Քարի գեղարվեստական լուսանկարչության միջեւ: Գործընկերներից մեկն էլ նշեց, որ Տաթեւ Մնացականյանը խուսափում է հարցազրույցներից, ոչ այն պատճառով, թե ասելիք չունի, այլ պարզապես իրե՛նը չէ սեփական արվեստը ներկայացնելը: 

«Առավոտը» հանդիպելով Տաթեւ Մնացականյանի հետ, համոզվեց, որ արվեստագետն իսկապես չի սիրում խոսել իր «արած-չարածի» մասին, այդուհանդերձ, ասաց, թե նոր է վերադարձել Ֆրանսիայից, հանդիպել է իր ձեւակերպմամբ՝ ֆանտաստիկ մարդկանց հետ, այցելել է Շալոն-սյուղ-Սոն քաղաք, որտեղ ծնվել է լուսանկարչության գյուտի հեղինակ Նյեպսը: Հիշեց, որ մինչ այդ եղել է Վան Գոգի ծննդավայր Աղլում, մասնակցել այնտեղ անցկացվող ամենահայտնի նկարչական փառատոնին: Երբ հիշեցրինք, թե 2018թ.-ն իր համար հոբելյանական է, մեր զրուցակիցը ընդամենն ասաց. «Սիրում եմ եւ նշում միայն իմ հերոսների հոբելյանները»: Հետաքրքրվեցինք իր «Մարդկային արվեստ- մշակույթի երկխոսություն» նախագծով: Լուսանկարիչը մանրամասնեց. «Ութամյա նախագծիս նպատակը անմահացնելն է մեր արվեստի մեծերին եւ սկսել եմ երջանկահիշատակ նկարչուհի, ցեղասպանության ականատես Ելենա Աբրահամյանի դիմանկարից: Այսօր դիմանկարների թիվը անցնում է 100-ը»: Մեր զրուցակիցը համամիտ չէ այն տեսակետին, թե արտասահմանյան ցուցադրությունների թիվը գերազանցում է հայաստանյանին: «2017թ. Երեւանում ունեցել եմ 6 ցուցադրություն, դրսինը չեմ հաշվել, որովհետեւ ընդհանրապես եւ մասնավորապես՝ արվեստում, սահման չեմ գծում… Հենց անցյալ տարի աշխատանքներս ցուցադրվեցին Հայաստանում Գերմանիայի դեսպանատանը եւ մեր իրականությունում առաջին անգամ նաեւ եղավ լուսանկարների ցուցադրություն դեսպանատան ֆասադին: Նման լուսային ձեւաչափով մինչ երեւանյանը իրականացվել էր Մյունխենում»,-ընդգծեց Տաթեւը: Հայտնեց նաեւ, թե մեծանուն հայ արվեստագետների, այդ թվում՝ կոմպոզիտորներ Էդվարդ Միրզոյանի, Ստեփան Շաքարյանի եւ մյուսների մեկական լուսանկարներ այս պահին ցուցադրվում են Արեւմուտքում: Ռեպլիկին՝ կոնկրետ ո՞ր երկրում, լուսանկարիչն ասաց՝ եվրոպական հարկի տակ, հավելեց նաեւ, թե այս պահին դարձյալ եվրոպական հարկի տակ ցուցադրվում է իր մեկ աշխատանքը Իդա Քարի ստեղծագործության կողքին: Անդրադառնալով «Մարդկային արվեստ-մշակույթի երկխոսություն» նախագծին, հարցին, թե այն ե՞րբ է ունենալու ավարտ, Տաթեւ Մնացականյանը ժպտալով պատասխանեց. «Դա շարունակական է, անավարտ…»:

Ինչ վերաբերում է արվեստագետի մշտական «հյուրախաղերին», մեր զրուցակիցն ասաց, որ դրանք իրականանում են իր եւ միջազգային կառույցների շնորհիվ, նաեւ այն երկրի, որը գնահատում է լուսանկարչությունը: Արվեստագետը հավելեց, որ 2015թ. Մյունխենում հրատարակվել է իր ծավալուն լուսանկարների պատկերագիրքը, որում տեղ են գտել վերջին 5 տարիների իր աշխատանքները:

Մեր զրուցակցին փոխանցեցինք մշակույթի նախարարի պաշտոնում տիկին Մակունցի առաջին օրերին հնչեցրած միտքը, թե լուսանկարչությունը իր նախընտրած ոլորտներից է եւ ցանկություն ունի այն զարգացնելու եւ եթե ինքը հանդիպեր նախարարին, ի՞նչ առաջարկ կաներ: «Չեմ հանդիպել նախարարին, բայց եթե երբեւէ հանդիպեմ, վստահ եմ, որ հետաքրքիր զրույց կունենանք»:

ՍԱՄՎԵԼ ԴԱՆԻԵԼՅԱՆ
Աղբյուր՝ Aravot.am:

Լրահոս
Ամերիկյան կինոակադեմիան որոշել է «Օսկարի» մրցանակակիրներին Մայր Աթոռում գումարվեց Ազգային-Եկեղեցական Ժողովի Սոցիալական հանձնախմբի առաջին նիստը Ֆրանսահայ անվանի երաժիշտը «Մեր հայրենիքի» մասին մի ամբողջ «դոսյե» ունի Մենք ունենք անմահ հոգի, խիղճ և ընտրության հնարավորություն Մեկնարկեց Հայ կոմպոզիտորական արվեստի 10-րդ փառատոնը Հասմիկ Պապյանի և Սիմֆոնիկ նվագախմբի համատեղ համերգի հասույթը կփոխանցվի «Արմենակ Ուրֆանյան» հիմնադրամին Ավետիք Իսահակյան․ Երջանկության իմաստը Վահագն Դավթյան՝ Համո Սահյանին Բրազիլիայի կառնավալին հազարավոր մարդիկ «Կեցցե Հայաստան» կվանկարկեն Մարտակերտում կկայանա Փարաջանովին նվիրված ցուցահանդես. կներկայացվեն բացառիկ նմուշներ Պատվիրանները մարդու մարդկային որակի ուղենիշներն են «Մշակույթի նախարարության հայտարարությունն ագրեսիայի, ստախոսության ու ամբարտավանության հավաքական գլուխգործոց է». «Պարալլելս Ֆիլմպրոդաքշն» ընկերություն Ամենայն հայոց կաթողիկոսը ցավակցել է Լուիզ Մանուկյան Սիմոնի վախճանման առիթով Հարություն Խաչատրյան. «Միությունը պատրաստ է իրավաբանական ծառայություն տրամադրել Հովհաննես Գալստյանին» «Մաեստրո Մանսուրյանի» և երևանյան պրեմիերայի մասին Մահացել է Էլմիրա Հեքեքյան-Աբրահամյանը Լավագույնս պատկերացում են տալիս հայ գրքի և գրատպության անցած ուղու մասին Գարեգին Բ և Արամ Ա կաթողիկոսները միասնական աղոթք են հնչեցրել Էջմիածնում «Եվ երբ պրոֆեսիոնալ երաժիշտ դարձա, կոնսերվատորիա ավարտեցի, նոր հասկացա, թե Կոմիտաս կատարելն ինչ բան է» Մեջբերումներ Թումանյանի մասին Հովհաննես Թումանյան․ Ուրախ գիշեր Ազգ-բանաստեղծ Եթե միայն այս կյանքի համար ենք հույս դրել ի Քրիստոս, ողորմելի ենք, քան բոլոր մարդիկ Փորձագետները կասկածում են, որ «Աշխարհի փրկիչ» կտավի հեղինակը Լեոնարդո դա Վինչին է Mezzo հեռուստաալիքը ֆիլմ է պատրաստել դիրիժոր Սերգեյ Սմբատյանի մասին Վարդան Հակոբյան․ Քո սերը քո տունն է Վարդան Հակոբյան․ Կապույտը Հայտնի են Բեռլինի միջազգային կինոփառատոնի մրցանակակիրները Փառասիրության մասին «Երևանը»՝ 200 քանոնահարի կատարմամբ Ֆրանսիայի խորհրդարանը քննարկում է կրթության մասին նոր օրենքը Դանիել Վարուժան․ Հարճը Կոմիտասի քնարերգությունը Վարդգես ԱՀԱՐՈՆՅԱՆ. Ամենայն հայոց բանաստեղծը Ռեժիսորը դեռ հացադուլ է անում, իսկ Մակունցը՝ ֆռռիկներ «Տեսնել չլիներ` կույրի պես կլինեին, ճանաչել և սիրել չլիներ` անասունի պես կլինեին» Հայ Եկեղեցու ու նրա հոգևորականության վրա հարձակումների տարափը պետք է առավել միավորեն մեր հասարակությանը «Երկրագնդի վրա որևէ երկրորդ պետությունը չունի այդպիսի կոմպոզիտոր, ինչպիսին Կոմիտասն է» Հասմիկ Պապյանի և Սիմֆոնիկ նվագախմբի համատեղ համերգի հասույթը կփոխանցվի «Արմենակ Ուրֆանյան» հիմնադրամին Համո Սահյան «Վշտացել եմ ամեն ինչից»
website by Sargssyan