450 գիտաշխատող կդառնա գործազուրկ

450 գիտաշխատող կդառնա գործազուրկ

«168 ժամը» գրում է. «ՀՀ կառավարության 2018թ. դեկտեմբերի 27-ի որոշման արդյունքում Երևանի պետական համալսարանի 450 աշխատակիցներ կկորցնեն աշխատանքը: Օրեր առաջ նրանք ծանուցումներ են ստացել, որում ասվում է՝ մարտի 31-ից ազատված են աշխատանքից: ԵՊՀ-ն ունի 3 գիտահետազոտական ինստիտուտ և 30 գիտահետազոտական կենտրոն ու լաբորատորիա: Այդ ենթակառուցվածքներում աշխատում է 450 մասնագետ, նրանցից 200-ը միայն գիտաշխատողներ են, այսինքն՝ համատեղության կարգով այլ հաստիքներում գրանցված չեն, կանգնած են աշխատանքն ընդհանրապես կորցնելու վտանգի առաջ՝ հաշվի առնելով, որ այլևս չկա բազային ֆինանսավորում: Այդ որոշմամբ՝ անմիջապես Գիտության պետական կոմիտեից կամ կառավարությունից բազային ֆինանսավորում ստացող գիտահետազոտական միավորներն այլևս չեն ստանալու ֆինանսավորում, այն փոխարինվելու է մրցութայինով՝ տենդերի պես: Խոսքը միայն ԵՊՀ-ին չի վերաբերելու, այլ նաև Բժշկական համալսարանին, Ֆիզիկայի ինստիտուտին, Ազգային պոլիտեխնիկական համալսարանին և այլն:

Փակվելու են մի քանի տասնյակ գիտական ինստիտուտներ, կենտրոններ ու լաբորատորիաներ, որտեղ աշխատում են անվանի և միջազգային ճանաչում ունեցող գիտնականներ, որ այդ հաստիքները զբաղեցնում են մրցութային կարգով (3-5 տարի ժամկետով): Որոշումը տարածվելու է նաև Հայոց ցեղասպանության թանգարան-ինստիտուտի, Մատենադարան հին ձեռագրերի գիտահետազոտական ինստիտուտի աշխատակազմերի վրա:

Մինչ գիտության ոլորտի աշխատակիցները փորձում են հասկանալ Փաշինյանի կառավարության որոշման տրամաբանությունը, թավշյա հեղափոխության որոշ կողմնակիցներ արդարացնում են՝ ասելով, թե այդ գիտահետազոտական հիմնարկներում աշխատողների 60-80 տոկոսը «պարապ կոֆե խմողներ» են, որոնք գիտական որևէ արդյունք չեն տալիս, և պետք է կրճատել նրանց», – գրում է թերթը:

Աղբյուր՝ Irates.am

Հետևեք մեզ նաև Telegram-ում