Մշակույթի ու ԿԳ նախարարությունների միավորումը վկայում է մշակույթի դերակատարության թերագնահատման մասին. ՀՅԴ

Մշակույթի ու ԿԳ նախարարությունների միավորումը վկայում է մշակույթի դերակատարության թերագնահատման մասին. ՀՅԴ

ՀՅԴ Հայաստանի ԳՄ Մշակույթի, երիտասարդության և սպրոտի հարցերով հանձնախումբն իր մտահոգությունն է հայտնում ՀՀ Մշակույթի և Կրթության ու գիտության նախարարությունները միավորելու վերաբերյալ շրջանառվող տեղեկությունների կապակցությամբ։

Հանձնախմբի տարածած հաղորդագրության մեջ ասված է. «Շրջանցելով հանրային քննարկումները, չներկայացնելով փորձագիտական համակողմանի եզրակացություն` նախարարությունների միավորումը հիմնավորվում է օպտիմալացման անհրաժեշտությամբ։

Մշակույթի (նաև երիտասարդության և սպորտի) ու Կրթության և գիտության նախարարությունների միավորումը վկայում է մշակույթի քաղաքական ընկալման և նրա դերակատարության թերագնահատման մասին։

Հազարամյակներ շարունակ, հայ մշակույթը՝ հայոց լեզվի և հայ եկեղեցու հետ, եղել է մեր ինքնության հիմնական հենասյունը, ձևավորել ազգային արժեհամակարգ և այն ամենը, ինչով աշխարհը ճանաչել է մեզ։ Մշակույթին մեծ դեր է վերապահված նաև Հայաստանի քաղաքական ներկայում և հեռանկարում։ Այն համակարգաստեղծ բնույթ ունի, մրցունակ երկրի նախապայման է, ձևավորում է պետականություն գիտակցող քաղաքացի և հասարակություն, լուծում է սոցիալական խնդիրներ։

Մշակույթին բացառիկ դերակատարություն է վերապահվածազգային անվտանգության և երկրի սոցիալ-քաղաքական փոփոխությունների ներկա համատեքստում։

Ի թիվս վերոնշյալ նպատակների և խնդիրների, ՀՀ կառավարության կառուցվածքում Մշակույթի նախարարության, իբրև առանձին պետական լիազոր մարմնի և ինստիտուտի անհրաժեշտությունը պարտադիր է՝ իրագործելու մշակույթի ոլորտում

ՀՀ Սահմանադրությամբ պետության ստանձնած պարտականությունները, բարեփոխելու գործող համակարգը, ապահովելու ոլորտի գործունեության օրենսդրական երաշխիքները, գործադրելու զարգացման ծրագրեր, իրականացնելու մշակութային ժառանգության պահպանության և զարգացման, գեղարվեստական կրթության մատչելիության ծրագրեր, միջազգային մշակութային երկխոսություններում ապահովելու Հայաստանի ներկայությունը, հանրահռչակելու հայկական մշակույթը և այլն։

Հորդորում ենք ՀՀ կառավարությանը` վերանայել կառավարության կառուցվածքի մասին շրջանառվող պատկերացումները։

Համաշխարհային քաղաքակրթական ժառանգության մեջ անուրանալի ներդրում, հազարամյակների մշակութային ժառանգություն ունեցող հայերիս համար մշակույթի լուսանցքումը հղի է անդառնալի հետևանքներով»։

Աղբյուր` Panorama.am

Հետևեք մեզ նաև Telegram-ում