USD
EUR
RUB

Գալստյան կիրակի. անցավոր ժամանակը ծուլությամբ մի՛ անցկացրեք

 

Մեծ Պահքի կիրակիների ոսկե շղթայի նախավերջին կիրակին կոչվում է Գալստյան, որը հիշեցնում է Փրկչի թե՛ Առաջին և թե՛ Երկրորդ Գալուստները: Առաջինով, այսինքն`Աստվածհայտնությամբ, մարդուն հնարավորություն տրվեց փրկությանն արժանանալու, քանդվեցին դժոխքի կապանքներն ու բացվեցին դրախտի դռները: Իսկ Երկրորդ Գալստյան հիշատակությամբ վերստին հիշում ենք, որ Քրիստոսը աշխարհի վախճանին «գալու է նույն մարմնով ու Հոր փառքով` դատելու ողջերին ու մեռածներին» («Հավատո հանգանակ»):

Սբ. Գրիգոր Տաթևացին, փրկության արժանանալու համար, խորհուրդ է տալիս ամեն ժամ բարին գործել, իսկ մեղքերի համար չզլանալ` զղջալ և ապաշխարել: Նա հետևյալն է ասում.

«Մարդն է բոլոր կենդանի էակներից ամենապատվականը, որ պարտավոր է մշտապես գործել. եթե չգործի, թռչուններն ու այն նվաստ կենդանիները կհանդիմանեն նրան, քանզի նրանք մշտապես գործում են, ինչպես ասում է Սողոմոնը. «Մրջյունի մոտ գնա, ո՛վ ծույլ, կամ մեղվի մոտ գնա, տես թե ինչպե՜ս գործունյա է նա»»:

Այս պատճառով է Քրիստոս ծուլացողներին ասում.

«Ինչո՞ւ եք այստեղ ամբողջ օրը պարապ կանգնել»:

Պետք է Տիրոջ այգին մշակել երկու պատճառով. նախ, որովհետև այս այգու տանուտերն Աստված է և խիստ մտահոգված է մշակներ վարձելու համար, այս պատճառով մշտապես մշակներ վարձելու է ելնում: Այգին` Աստծո եկեղեցին է, և ոմանք ասում են, թե սկսած Աբելից մինչև վերջին արդարները, որքան սուրբեր, որ եղել են, այնքան էլ Աստծո այգու մշակներն են: Եվ վարդապետների միջոցով սկզբից մինչև վերջ տարբեր ժամերին Աստված չի ծուլանում խնամել հավատացյալ ժողովրդին: Հետո Ինքն անձամբ դուրս եկավ, որովհետև մինչ այս մարգարեների և հրեշտակների միջոցով էր հայտնել Իր կամքը, և այժմ Նա անձամբ հայտնապես եկավ, և, հեթանոսներին անգործության մեջ ու բարությունից զուրկ տեսնելով, կանչեց նրանց: Ուրեմն, չպետք է անհույս լինենք Աստծո ողորմության պատճառով, որովհետև ամեն ժամ Աստված պատրաստ է մեղավորին ապաշխարության կանչելու, նույնիսկ մինչև խոր ծերություն, որովհետև մանկությունից մինչև ծերություն խնամում և ապաշխարության է կոչում նրան, ինչպես ասում է Եսայի մարգարեն.

«Դուք մինչև խոր ծերություն էլ, որ հասնեք, Ես նույնն եմ, Ես համբերությամբ պիտի տանեմ ձեզ, Ես ստեղծեցի և Ես էլ պիտի հանդուրժեմ, Ես պիտի ընդունեմ և փրկեմ ձեզ»:

Սքանչելի է Աստված, և քաղցր է Նրա ողորմությունը: Մայրը կերակրում է որդուն, երբ նա մանուկ է, կուրծք է տալիս և իր գրկում պահում, սակայն երբ մեծանում է, դուրս է թողնում, մինչդեռ Աստված մանկությունից մինչև ծերություն խնամում է մարդուն: Այգու տերը` Հայր Աստված է, իսկ գավառապետը` Քրիստոս է, Ում վերջին օրն Իր աթոռին է կանչում, ինչպես ասում է Պողոս առաքյալը.

«Մենք բոլորս պետք է կանգնենք Աստծո աթոռի առաջ» և տալիս է վարձը, սկսելով վերջիններից, նախ` ավազակին է տալիս, ասելով. «Այսօր ինձ հետ դրախտում կլինես», հետո` Ադամին, Նոյին, Աբրահամին, Մովսեսին և այլոց, ում ազատեց դժոխքից: Հարկ է արիությամբ բարի գործեր գործել, որովհետև Աստված չորս տուն շինեց, որոնք են` արքայությունը, դրախտը, սուրբ եկեղեցին և դժոխքը: Արդ, ծույլերը, որ երբեք բարիք չեն անում, ո՞ւր են գնում, ո՛չ արքայություն, ո՛չ դրախտ, ո՛չ եկեղեցի, որովհետև այստեղ եկեղեցում է մեղքերի քավությունը, ովքեր խոստովանում են և բարին գործում ու քավում իրենց մեղքերը: Նրանք, ով ծույլ են, չեն ապաշխարում և չեն քավում իրենց մեղքերը, ահա հայտնի է, որ դժոխք են գնում: Այսինքն, ծույլերը, ովքեր այստեղ չապաշխարեցին ու չքավեցին իրենց մեղքերը, այլ ծուլացան և ծանրացան մեղքերով, դժոխք են իջնում` սատանայի հետ հավիտենապես տանջվելու: Արդ, այն մասին, թե ինչո՞ւ է այդքան մեծ ծույլերի պատիժը, և գործավորների պարգևն այնքան մեծ: Օրինակ` սուրը, որ իր պատյանի մեջ անգործ է, ժանգոտվում է, բայց երբ գործածում են այն` անախտ ու մաքուր է մնում:

Այսպես է և մարդու հոգին` անգործ մնալով, ժանգոտվում է մեղքով, բայց երբ գործում է` անախտ է մնում: Նաև հագուստը, որ պահում են և չեն հագնում, ցեցոտվում ու փտում է, բայց երբ հագնում են` անփուտ է մնում: Այսպես ծույլը մեղքերի բազում որդեր է ծնում իր հոգում, իսկ գործունյան անվնաս է մնում: Սրա համար վարդապետներն ասում են, թե միշտ գործիր, որ սատանան, քեզ, գործի մեջ տեսնելով, չմոտենա, ինչպես ճանճը չի համարձակվում մոտենալ եռացող ջրին կամ կաթին, և միայն հանգստանալու և սառելու ժամանակ են հավաքվում ճանճերը:

Այդպես էլ դևերն են մարդու հոգու հանդեպ` փախչում են գործավորից և պարապ մարդու մոտ գնում: Պետք է գործել, որովհետև որքան ժամանակ, որ այս աշխարհում ենք, այնքան ապաշխարության տեղում ենք, ո´չ թե հանգստավայրում: Սատանան նախ փառք սիրեց ու հանգստացավ և սրա համար դժոխք մտավ, նույնպես և հիմար կույսերը, որ ծուլացան այստեղ և հետո, այնտեղ, գնացին յուղ գնելու: Փեսան եկավ, և ով պատրաստ էր մտավ հարսանիքի սրահը, իսկ նրանք դուրս մնացին և ասացին.

«Տե՛ր, Տե՛ր, բաց արա», և Նա ասաց. «Ձեզ չեմ ճանաչում»: Որի համար էլ հանուն Քրիստոսի սիրո աղաչում եմ ձեզ, անցավոր ժամանակը ծուլությամբ մի´ անցկացրեք:

Մենք պետք է այստեղ գործենք բարին, որպեսզի այնտեղ հատուցվի, այստեղ սերմանենք և այնտեղ հնձենք, այստեղ բաժանենք և տանք աղքատներին և այնտեղ հավաքենք հավիտենական կյանքում, այստեղ պատրաստենք ողորմության յուղը և այնտեղ իմաստուն կույսերի հետ մտնենք լույսի առագաստն ի Տեր մեր Հիսուս Քրիստոս, Ով օրհնյալ է հավիտյանս հավիտենից ամեն»:

Կազմեց Կարինե Սուգիկյանը

Աղբյուր՝ Holytrinity.am

Լրահոս
Հրաչյա Թամրազյան. Բանաբան Կոստան Զարյան․ Ճամփորդություն Մատթեոս Զարիֆյան-Մարի Պոզապալյան․ «Ծովուն դիմաց» Ոչ սովորական նկարիչը Սլավի-Ավիկ Հարությունյան կամ միայնակ թռչունը Մահացել է համաշխարհային կինոյի լեգենդ Ֆրանկո Ձեֆֆիրելին Հիսուս, բժշկիր սերը բոլոր մարդկանց Տեղի կունենա «Քալաշյան պրոֆեսիոնալ պարային դպրոցի» մենահամերգը «Ամենասուրբ Երրորդության» գաղափարը արտահայտող ինքնատիպ պատկերները Խաչատրյանի միջազգային մրցույթում հաղթել է Հայաստանի ներկայացուցիչը Ս. Եղիա մարգարեի (9-րդ դար ն. Ք.)` երկինք համբարձման պատմությունը Գեղամ Սարյան․ Փառքի տաճարը Հանրահայտ կինոռեժիսոր Կառլոս Ռեյգադասը «Ոսկե ծիրան»-ի հատուկ հյուրն է Ինչ «մեսիջ» է հղում արվեստագետը Մեզնից խլել են փորձում մեր գալիքը «Ազնավուր» կենտրոնում կնշվի Երվանդ Քոչարի ծննդյան 120-ամյակը Ամեն ընտանիք մի փոքրիկ եկեղեցի է «Կան մարդիկ, որոնք կուսակցական ժողովների կարոտախտ ունեն, բայց Գրողների միությունն այդպիսի ժողովների վայր չէ» Մայր Աթոռ Սուրբ Էջմիածնում հյուրընկալվեցին Լոս Անջելեսի ՀԲԸՄ Մանուկյան-Դեմիրճյան դպրոցի 10-րդ դասարանի աշակերտները Գեղարվեստի ակադեմիայի շրջանավարտների աշխատանքները կներկայացվեն Նկարիչների միությունում Սայաթ-Նովա․ Ինձ սիրեցիր, էշխըն նընգար, խաղի դավթար իմ քիզ ամա Հովհաննես Թումանյան․Շունը Հովհաննես Գրիգորյան․ Սիրտ Խաչատրյանական մրցույթի ժյուրիի անդամը Հայաստանում բացահայտում է հայկական երաժշտությունը Վարդան Հակոբյան․ Անվերադարձ աչքեր Մեքսիկայում առաջին անգամ հայտնաբերվել է Ֆրիդա Կալոյի ձայնի ձայնագրությունը Եղիշե Չարենց․ Ընկեր «Ինձ տեսնում են այնտեղ, որտեղ հրավիրում են» Աստված ստեղծել է նրանց տղամարդ ու կին Ակսել Բակունցի ծննդյան 120- ամյակի առթիվ Գորիսում կանցկացվեն միջոցառումներ Երեւանում կմեկնարկի 16-րդ «Ոսկե ծիրանը» «Ամադինդա» հարվածայինների լեգենդար խումբը՝ Հայաստանում Վահագն Դավթյան․ Կանչ Ռուբեն Սևակ․ Գիշերն իջավ Երջանկության քրիստոնեական ընկալումը Աստվածճանաչողությունը եւ աստվածգիտությունը սկսվում են հավատքով Հայաստանի պետական ջազ նվագախումբը հանդես կգա վոկալիստ և շեփորահար Ռոնալդ Բեյքերի հետ Մատթեոս Զարիֆյան․ Բանաստեղծություններ Արտաշես Հարությունյան. Վերջալույսի աղջիկը Սերգեյ Սմբատյան. «Շատ կարևոր է քիմիական կապը, որ կա Սերգեյ Խաչատրյանի և Հայաստանի պետական սիմֆոնիկ նվագախմբի միջև»
website by Sargssyan