USD
EUR
RUB

Անանիա Նարեկացի. Խրատ անմաքուր խորհուրդներից զգուշանալու մասին

 

Արդ, խնդրեցիր, որ խրատ գրեմ անմաքուր խորհուրդների մասին, քանի որ գիտեմ դրանցից զգուշանալ և զգաստ լինել:

Նախևառաջ, մտքերի մաքրության համար հոգ տար: Մարգարեն ասում է. «Փառավորված է Աստված իր խորհուրդներում» (Սաղմ. ՁԸ 8):Ինչպես ծառան է սպասում է իր տիրոջ հրամանին, այնպես էլ բոլոր զգայարանները մտքի կողմից են կառավարվում:

Այսպես. մարդ նախ խորհում է բարին, հետո՝ իրագործում: Ինչպես մարգարեն է ասում. «Խորհեցի և պահեցի քո ճանապարհները» (հմմտ. Եսայի ԽԶ 11):
Մարդ նախ խորհում է մեղքը, հետո՝ կատարում: Ինչպես մարգարեն է ասում. «Հղացավ չարիք և ծնեց անօրենություն» (Սաղմ. Է 15):

Մարդ նախ մտքով է սիրում, հետո պարգևներ տալիս, ինչպես որ Հովնաթանը նախ հոգով կապվեց Դավթի հետ, ապա հանեց իր հանդերձները և հագցրեց նրան (տե´ս Ա Թագ. ԺԸ 1-4):

Մարդ նախ մտքով է ատում, հետո սպանում, ինչպես որ եղբայրները նախ ատեցին Հովսեփին, հետո վաճառեցին Եգիպտոս (տե´ս Ծննդ. գլ. ԼԷ):

Եվ հայտնի է, որ բոլոր զգայարանները կառավարվում են մտքի կողմից: Սրա համար էլ դու բոլոր զորություններդ գործադրի´ր և մտքերդ սրբի´ր ամեն տեսակ աներևույթ և զգայական մեղքերից, բայց առավել զգուշացի´ր պոռնկական մտքերից: Սրա համար է Տերն ասում. «Շնացավ իր սրտում» (Մատթ. Ե 28):

Զգո´ւյշ եղիր տեսնելու և լսելու հարցում, քանի որ տեսնելն ու լսելը խորհուրդների դուռն է: Սրա համար է առաքյալն ասում. «Ամեն տեսակ պղծություն կամ պոռնկություն թող չհիշվի ձեր մեջ, ինչպես որ վայել է սրբերին» (Եփես. Ե 5): Օրինակ, մարդ կարող է քաղցած լինել, բայց չմտածել այդ մասին, իսկ երբ տեսնում է լի սեղան, այդ ժամանակ քաղցն իրեն զգալ է տալիս, և մարդ ցանականում է ուտել: Մարդ կարող է ծարավ լինել, բայց չմտածել այդ մասին, իսկ երբ տեսնում է զուլալ աղբյուր, այդժամ ծարավը սաստկանում է, և մարդ ցանկանում է ըմպել:

Այսպես և մարդու հանդեպ ցանկությունը լռությամբ զսպվում է, բայց երբ մարդ տեսնում է գեղեցիկ դեմքեր կամ լսում պոռնկական երգեր, այդ ժամանակ բորբոքվում է ցանկությունը և ստիպում է մեղանչել մարդուն: Դրա համար էլ փակի´ր աչքերդ և ականջներդ, որ չհասնի քեզ անմաքուր խորհուրդների պատերազմը:

Օրինակ, երբ արծիվը թռչելիս թակարդի մեջ կերակուր է տեսնում, ուժգնորեն իջնում է բռնելու այն, իսկ երբ մագիլի ծայրը բռնվում է թակարդում, մարմնի այս փոքրիկ մասի պատճառով խոնարհվում է արծվի ողջ զորությունը: Այսպես և մարդն է. պատահում է, որ մի փոքր բանի պատճառով ընկնում է թակարդը:

Եթե կամենում ես հաղթել պոռնկական խորհուրդները, հրաժարվիր նաև ավելորդ կերակրից և ըմպելիքից: Սրա համար է մարգարեն ասում. «Հագեցրի քեզ, Իսրայե´լ, իսկ դու քո բոլոր քաղաքները պոռնկանոց սարքեցիր» (հմմտ. Երեմ. Ե 7):

Անմաքուր խոհուրդների պատճառ է, երբ չարախոսում և բամբասում ես ընկերոջդ մասին, երբ ատում ես կամ հպարտանում: Այդ ժամանակ Աստված թույլ է տալիս, որ չար խորհուրդները հարձակվեն քեզ վրա և խավարեցնեն միտքդ: Իսկ եթե լինես հեզ, խոնարհ և ողորմած, մարդասեր և խաղաղարար, այդժամ Աստված կհալածի խռովարար խորհուրդները, և միտքդ կլուսավորվի:

Անմաքուր խորհուրդների պառճառ կարող է լինել, երբ ծուլանում ես աղոթել և աշխատել, քեզ քնի ես տալիս և հանգստի: Այդ ժամանակ սատանան պիղծ խորհուդների սերմեր է ցանում քո սրտում և խավարեցնում միտքդ: Եթե լինես զգաստ և զվարթ, աղոթական և խոհեմ, այդժամ գարշելի խորհուրդները կհալածվեն, և միտքդ կլուսավորվի:

Անմաքուր խորհուրդների պատճառ կարող է լինել երկրավոր գործերով շատ զբաղվելը: Պիղծ մտքերը, խառնվելով այլ խորհուրդների հետ, մտնում և խավարեցնում են միտքդ: Եթե զսպես քեզ մարմնավոր խորհուրդներից, այդժամ հոգևորի մեջ կվարժվես, և միտքդ կլուսավորվի:

Երբ կգա պիղծ խորհուրդը, դու տագնապիր, մարտնչիր, խոստովանիր և ապաշխարիր, որպիսի չընտելանաս, չհամակերպվես և չպարտվես: Սրա համար է առաքյալն ասում. «Քանդում ենք գաղտնի մտածումները և դրանց բարձրությունները, և գերելով բոլոր մտքերը` հնազանդեցնում ենք Քրիստոսին» (Բ Կորն. Ժ 4-5):

Օրինակ, գողը խավարը իր համար զենք ունի և գողության է գնում գիշերը, իսկ երբ լույսը բացվում է, նա վախենում է լույսից և փախչում: Այսպես և սատանան է գող, երբ տեսնում է միտքդ խավարած, թուլացնում է այն: Այդ ժամանակ դու Քրիստոսի լույսը ծագեցրու քո մտքում, և սատանան կհալածվի, ու միտքդ կլուսավորվի: Քրիստոս ասում է. «Ես եմ լույսն աշխարհի» (Հովհ. Ը 12):

Եվ մի ժամ անգամ թույլ մի´ տուր պոռնկական խորհուրդներին մոտենալ քեզ: Հիշի´ր տերունական ահարկու խոսքը, որ է. «Շնացավ իր սրտում» (Մատթ. Ե 28):

Եվ ինչպես քաղաքն են պարսպապատում մինչ թշնամու գալը, այսպես և դու, նախապես պարուրիր միտքդ պահքով, աղոթքով ու արտասուքով, և Աստված քո ջանքերը կտեսնի ու կլուսավորի միտքդ:

Եվ փոքր մի´ համարիր մտքում հանցանքները, քանի որ հպարտությունը, նախանձը և ատելությունը մտքով են լինում և մեծամեծ մեղքեր են:

Օրինակ, քանի դեռ թշնամին ամրոցից դուրս է, հեշտությամբ կարող ես զգուշանալ նրանից, իսկ եթե մարտնչելով գրավի ամրոցը և մտնի ներս, այն ժամանակ դժվար է հանել նրան այնտեղից: Այսպես և դու. զգուշացի´ր խորհուրդների պատերազմից, քանի դեռ դրանք դուրս են քո մտքի ամրոցից: Իսկ եթե մարտնչելով վերցնեն ամրոցդ և ներս մտնեն, այն ժամանակ առավել ջանքեր կպահանջվեն քեզանից:

Սրա համար էլ դու զորացի´ր և մշտապես մտքերդ աստվածահաճո պահի´ր, որ դառնաս Սուրբ Հոգու տաճար, և Նրան վայել է փառք, իշխանություն և պատիվ, այժմ և հավիտյանս. ամեն:

Գրաբարից փոխադրեց՝ Լուսինե ԹՈՒՄԱՆՅԱՆԸ

Աղբյուր՝ Qahana.am

Լրահոս
«Օնեգինը»՝ ռուսական թատրոնի բեմում Հրաչյա Թամրազյան. Հետքեր Ագահը Ալադինին մարմնավորած Մենա Մասուդը՝ «մեկ դերի գերի» Փարաջանով-Փելեշյան ալգորիթմը նույնչափ կարեւոր է, ինչպես Մաշտոցի այբուբենը Հրատարակվել է Իրինա Բարսեղյան-Կրպեյանի մենագրության անգլերեն թարգմանությունը Արամի 23 -ի հարևանությամբ ապօրինի քանդման աշխատանքները կասեցված են Հրաչյա Թամրազյանի մտերիմներն ու գործընկերները ցերեկույթով նշեցին նրա տարեդարձը Գոգենի կտավը վաճառվել է 9,5 միլիոն եվրոյով «Եվրոպայի ընտրությունը» տիտղոսը Հայաստանինն է Վիլյամ Սարոյան. Գյուղացին Հայաստանն ու Բելառուսը մշակութային նոր կամուրջներ կկառուցեն. հուշագիր պատմության թանգարանների միջև Վահան Թեքեյան․ Իմ գյուղը Ռուբեն Հովսեփյան. «Ոսկու շուկայում» Հովհան Ոսկեբերանի ճառն այն մասին, որ, ինչպես ցույց են տալիս սրբերի օրինակները, չկա որևէ առաքինություն, որը չարիք է բերում Գոգենի կտավն աճուրդում վաճառվել է 9,5 մլն եվրոյով Դերասանուհի Հելեն Միրենը պատվավոր «Ոսկե արջ» կստանա Բեռլինալեում Ավիշայ Քոենի և Սիմֆոնիկ նվագախմբի ինքնատիպ համերգը կնվիրվի Լևոն Մալխասյանի 75-ամյակին Կենտրոնական Եվրոպայի Հայրապետական Պատվիրակ Տեր Տիրան եպիսկոպոս Պետրոսյանը հովվական այցով գտնվեց Շվեդիայի Գոթենբուրգ քաղաքում Ջեքսոնի երգերը գործիքավորելիս օգտագործվել է նաև դուդուկ Ռուբեն Էլբակյանը մենահամերգ է ունեցել Փարիզի պատմական Լա Մադլեն եկեղեցում Կյանքից հեռացել է բալետի արտիստ Մաքսիմ Մարտիրոսյանը ԶՈՒ ԳՇ ռազմանվագախմբային ծառայությունը նշել է կազմավորման տարեդարձը Նիկոլայ Նիկողոսյանի գրաֆիկական աշխատանքները կներկայացվեն Մոսկվայում «Աստծո վրա դրի իմ հույսը և վախ չունեմ, մարդն ինձ ի՞նչ կարող է անել» Վահագն Մուղնեցյան․ Աղոթք Սոնա Վան․ Ադամի արարումը «Հովեր» պետական կամերային երգչախումբը հյուրախաղերով հանդես է եկել Գերմանիայում և Բելգիայում Հնագույն շրջանից մինչև մեր օրեր. ներկայացվեց հայկական որմնանկարչությանը նվիրված ժողովածու Արցախի պետական պատմաերկրագիտական թանգարանն 80 տաեկան է Վահագն Դավթյան․ Համո Սահյանին Վահան Տերյան․ Մենության խավար զնդանից կրկին Սբ. Բեռնարդոս, «Մարիամի՝ Տիրոջ աղախնու խոնարհությունը» «Ռեվյու» հաղորդման հյուրն է Գերաշնորհ Տեր Միքայել Արքեպիսկոպոս Աջապահյանը Մարվեց նամականիշով նոր գեղաթերթիկ՝ նվիրված «Մեծանուն հայեր. Կոմիտասի ծննդյան 150-ամյակը» թեմային Դավիթ Սահակյանց. Ես կողմ եմ այդ տեսակ ցենզուրայի Ազգային գրադարանը ցուցահանդեսով շնորհավորեց Գրողների միության 85-ամյակը Նվիրում Շնիտկեին «Սառը սիրտ 2» մուլտֆիլմը դրամամուտքերի ռեկորդ Է սահմանել տոնական հանգստյան օրերին «Կոմիտասյան գոհարները ոչ ոք չի խլի, եթե ինքներս չկորցնենք դրանք»
website by Sargssyan