USD
EUR
RUB

«Եթե Քրիստոս ձեր մեջ է, ապա մարմինը մեռած է մեղքի համար»

 

«Իսկ եթէ Քրիստոս ի ձեզ է, ապա մարմին մեռեալ է վասն մեղաց և հոգին կենդանի է վասն արդարութեան»:

«Եթե Քրիստոս ձեր մեջ է, ապա մարմինը մեռած է մեղքի համար, և հոգին կենդանի է արդարության համար» (Հռոմեացիներ 8:10):

Սիրելի՛ հավատավոր զավակներ Հայ Առաքելական Սուրբ Եկեղեցու.

Կիրակնօրյա պատարագ է, և Աստծո Միածին Որդու՝ Հիսուս Քրիստոսի զոհաբերումն է՝ հանուն մեր փրկության: Ամեն կիրակի Նա պատարագվում է աշխարհի բոլոր եկեղեցիների սուրբ սեղաններին: Պատարագվում է՝ հրավիրելով Իր մարմնի ճաշակմանը, որպեսզի մեզ մեղքերից մաքրի, սրբի և ազատի:

Ադամի ու Եվայի անկմամբ մարդկությունն ընկավ մեղքի իշխանության տակ, որի վրա տեր և իշխան էր կարգված: Քրիստոս եկավ ազատագրեց մեզ այդ իշխանությունից, մեղքի հպատակությունից, մեղքին ենթակա լինելուց: Մենք՝ իբրև մեղքով հիվանդացածներ, մոտենում ենք Սուրբ Սեղանին՝ մեղքերից բժշկվելու, մաքրվելու և Աստծո հետ միավորվելու:

Սիրելինե՛ր, բոլոր կրոններն ունեն իրենց բարոյականության սահմանումը, իսկ բարոյականությունը հիմնվում է մաքրության գաղափարի վրա: Բոլոր կրոններն ունեցել են քավության նոխազի իրենց պատկերացումը, որը մեղքերի թոթափումն ու մաքրագործումն է: Մաքրությունը մեղքից ձերբազատումն է: Աստվածաշնչի բոլոր գրքերը աղաղակում են մարդկային մեղքի մասին: «Ծննդոց գիրքը» ցույց է տալիս նախաստեղծ մարդկանց անկումը և մեղքի ծագումը: «Ղևտական» և «Երկրորդ օրենք» գրքերում Հայր Աստված Մովսեսի միջոցով պատվիրաններ և օրենքներ է տալիս հրեա ժողովրդին, որպեսզի մարդիկ սահմանազատեն անօրինությունը արդարությունից: Դատավորաց գրքում տեսնում ենք, որ Աստված դատավորներ է կարգում, որ դատեն Իր ժողովրդին՝ հանցանքների համար համապատասխան պատիժներ սահմանելով: Սաղմոսները, ինչպես Դավիթ թագավորի համար, այնպես էլ մեզ համար, մեղքերի զղջման և ապաշխարության լավագույն աղոթքներն են մնում: Առակների, Ժողովողի գրքերը կրթում և հորդորում են մարդկանց մեղքերից հեռու մնալ: Թագավորությունների չորս գրքերում Աստված ցույց է տալիս, թե ինչպես հրեա ժողովուրդն իր մեղքերի ու կռապաշտության պատճառով կորցնում է իր պետականությունն ու անկախությունը և ընկնում այլ ժողովուրդների լծի և իշխանության տակ: Ի վերջո մինչև Քրիստոսի ծնունդը Աստված մարգարեների միջոցով խոսում է իր ժողովրդի հետ՝ նրանց սթափեցնելու մեղքերի թմբիրից և ավետում մարդկության Փրկչի ծնունդը: Ավետարանում արդեն Աստծո Միածին Որդին է խոսում, անխտիր բժշկում բոլոր հիվանդներին: «Գնա՛ ու այլևս մի՛ մեղանչիր», ասում է մեզ բարեգութ Տերը: Սուրբ Գիրքը ամբողջությամբ մեզ կոչ է անում՝ դառնալու մեր մեղքերից, որոնց ենթակա էին աստվածաշնչյան սուրբերը նույնպես: Նրանք տկար էին մեզ նման և մեր աչքի առջև ունենում են իրենց անկումներն ու մեզ նման մեղքեր են գործում, բայց մնում են Աստծո հավատարիմ ծառաները: Սուրբ Գիրքը միաժամանակ մեզ ազդարարում է նաև Աստծո ներողամտության, ողորմածության և գթառատության մասին, որ Նա մեզ շնորհներ է տալիս՝ հաղթահարելու մեղքերը Իրենով:

Քրիստոս շնորհում է մեզ մեղքից ազատագրումը Իր արյամբ: Որովհետև այլևս կենդանիների զոհաբերությունը չէ, որ մաքրում է մեզ մեր մեղքերից, այլ Աստծո Որդու խաչի վրա թափված արյունը: Աստված մեզ տալիս է փրկություն՝ առանց մեր հայցելու:

Նրա հոգատարությունը անսահման է մարդու նկատմամբ, երբ Նա ասում է մեզ՝ որքան որ ընկնում ես, որքան մեղանչում ես, վե՛ր կաց, զղջա՛ և դարձի՛ր դեպի Ինձ, որովհետև Իմ Որդու արյունը փրկագործ է, կենսատու է և կենարար, ձեզ տալիս եմ այդ հնարավորությունը՝ Ինձ Հայր կոչելու և դիմելու, ամեն մեղքից հետո էլ չեմ մերժում ձեզ, այլ սիրով սպասում եմ ձեր զղջմանը: Սուրբ Պողոս առաքյալը գրում է, որ Հիսուս Քրիստոսով մարդկության մեղքերի պարտամուրհակը պատռվում է. «Եվ ձեզ, որ մի ժամանակ մեռել էիք մեղքերի և ձեր մարմնի անթլպատության մեջ, կենդանացրեց իր հետ: Նա ներեց մեզ մեր բոլոր հանցանքները և ոչնչացրեց հրամաններով հաստատված այն պարտամուրհակը, որ մեր դեմ էր, վերացրեց այն մեջտեղից և մեխեց խաչափայտին» (Կողոսացիներ 2:13,14):

Քրիստոսի խաչելությունը շրջադարձային նշանակություն է ունեցել ողջ մարդկության համար: Այն աշխարհում պատմվող մտացածին առասպելներից կամ ավանդազրույցներից չէ, այլ հավաստի կատարված ճշմարիտ իրողություն է, որին մարդկությունը պիտի ուշ դարձնի: Պատրանք կամ խաբկանք չէ մարդ-Աստված հարաբերությունը, պատրանք չէ նաև մեղքերից մաքրվելը մեր Տեր և Փրկիչ Հիսուս Քրիստոսով, խաբեություն չէ մարդու հոգու և մարմնի բժշկությունը: Քրիստոս Ճշմարիտ Աստված է և մեզ ճշմարտապես փրկություն է շնորհում: Մենք՝ քրիստոնյաներս, ինքնախաբեությամբ չենք զբաղվում, որովհետև սատանան մոլորեցրեց նախաստեղծ մարդկանց, այդպես շարունակաբար մոլորեցնում է մարդկությանը՝ ներշնչելով, որ Աստված չկա, պետք չէ անհանգստանալ մեղքերի համար, կամ մարդն ազատ է անելու այն, ինչ ցանկանում է: Եվ մարդկության մեջ ընդհանրապես և մարդու հոգում անհատապես մեղքը դառնում է գերակա:

Քրիստոսի խաչելությամբ ու պատարագմամբ ոչ միայն ներում է շնորհվում մեզ, այլև Տերն Իր սերն ու շնորհներն է տալիս, ոչ միայն մատնացույց է անում մեր հիվանդություններն ու վերքերը, այլև բուժում է դրանք, ոչ միայն ցույց է տալիս մեր քաղցն ու սովը, այլև կերակրում է մեզ ու Երկնային Արքայության սեղաններն է բաց անում մեր առջև, ոչ միայն մշակում է մեր հողը, այլև գիտի, թե ինչ է մեզ անհրաժեշտ պտղատու լինելու համար:

Սիրելինե՛ր, մարդկային հոգու կործանումը այնժամ է տեղի ունենում, երբ նա հանդուրժող է դառնում մեղքի նկատմամբ: Մարդկային հոգին անուշահոտություն է բուրում առանց մեղքի, իր մաքրության մեջ: Առանց մեղքի՝ մարդկային հոգին հոգևոր խաղաղության մեջ է և պատրաստ է՝ ընդունելու իր Արարչին: Մինչդեռ մեղքը փոթորկում է մեր հոգիները, աղտոտում և հիվանդացնում: Մեղքերը գլխավոր խոչընդոտն են՝ Աստծո հետ միավորվելու: Դրանք անջրպետ են ստեղծում մեր և Սուրբ Հոգու միջև: Անհրաժեշտ է անհանդուրժող լինել մեղքի նկատմամբ և Սուրբ Հոգով լցվել: Ինչպես հռոմեացիներին ուղղված նամակում է ասվում. «Այժմ, ազատված մեղքից և ծառա դարձած Աստծուն՝ ձեր պտուղն եք տալիս սրբությամբ, և նրա վախճանը կյանք է հավիտենական. քանի որ մեղքի վարձը մահն է, իսկ Աստծու շնորհը՝ հավիտենական կյանք՝ մեր Տեր և Փրկիչ Հիսուս Քրիստոսի միջոցով» (Հռոմեացիներ 6:22, 23):

Ուստի՝ մաղթում եմ կիրակնօրյա պատարագների շնորհով և զորությամբ մաքրվել մեղքերից, զղջումով և ապաշխարությամբ հաղորդվել Տիրոջ Կենարար Մարմնին և Արյանը, քանի որ «Նրանով է, որ ունենք փրկություն, Նրա արյան միջոցով՝ մեղքերի թողություն» (Եփեսացիներ 1:7):

Շնորհք, սէր և խաղաղութիւն Տեառն մերոյ Յիսուսի Քրիստոսի եղիցի ընդ ձեզ, ընդ ամենեսեանսն. Ամեն:

Տեր Վահան քհն. Առաքելյան

Աղբյուր՝ Surbzoravor.am

Լրահոս
Անի Ամսեյան Ավագ Եփրեմյան․ Լույս-փոխակերպուկ Վրեժ Իսրայելյան. Թանկագին հյուրը «Հայաստանի Հանրապետություն» օրաթերթ. Ազգային երաժշտարվեստի զուլալ ակունքներից «Հայաստանի Հանրապետություն» օրաթերթ. ԱՄԵՆ ԴԻՐԻԺՈՐ ԻՐ ԱԿՆՈՑՈՎ Է ՆԱՅՈՒՄ ՆՈՏԱՆԵՐԻՆ «Դեռ իմ երազած թատրոնում եմ» Անդի Մադաթյանը անվանական աստղ է ստացել Հոլիվուդի փառքի ճեմուղում «Մի՞թե ծնողներն իրենց որդիներին չարը կկամենան» Հայաստանի ազգային ֆիլհարմոնիկ նվագախումբը չինական Սյամին քաղաքում կազմակերպել է ֆլեշմոբ Հովհաննես Գրիգորյան․ Պատժի առավելագույնը Միխայիլ Միշուստինը՝ Լեպսի երգերի հեղինակ Եթե հաջողվի հաստատել, որ Ռուզաննա Մանթաշյանի հայտարարությունները համապատասխանում են իրականությանը, ապա Semper Opera Ball-ի գործակալությունը կլուծարվի․ ԵՀՄՖ Դանիել Վարուժան. Մուսային Ռուբեն Որբերյան. Սիրո շողքերը Կինոյի պետական կառավարման ոլորտում հովանավորչությունն ու կոռուպցիան չի նվազել, ավելացել է անհավասար մրցակցությունն ու խտրական վերաբերմունքը. Ֆիլմարտադրողների հայտարությունը Տարածվել է Սատուրնի լուսնի սառցապատ մակերևույթը, որտեղ կարող է կյանք լինել Անցած տարում մաքրվել և բարեկարգվել են մոտ 4 տասնյակ պատմական հուշարձաններ ՌԴ ժողովրդական արտիստ Իգոր Նիկոլաեւը նշում Է իր 60-ամյա հոբելյանը Հենրիկ Մալյանի բեմադրած «Թումանյանի հեքիաթները» կարելի է Գինեսի ռեկորդակիրների գրքում գրանցել «Ա­մե­րի­կա, չե՞ս կա­րո­ղա­նում դի­վա­նա­գի­տու­թ­յունդ էդ մար­դաս­պան­նե­րի պա­րագլ­խի հետ վա­րել էն­պես, որ նա չլի­նի քեզ թե­լադ­րո­ղը» Կյան­քը ա­վե­լին է, քան պար­զա­պես գո­յութ­յու­նը կամ կեն­դա­նու­թ­յու­նը Ռազմիկ Դավոյան․ Մենք անհայտ կորածներ ենք Երուխան. Վրեժը Բոլոր գիտություններից ամենագեղեցիկն ու ամենակարևորը Արաքս Մանսուրյանին ՀՀ քաղաքացիություն է շնորհվել Կկատարվի հոգեհանգիստ Բաքվում և Սումգայիթում իրականացված հայերի ջարդերի 30-րդ տարելիցի առիթով Անգլիացի խստապահանջ ունկնդիրը հոտնկայս ծափերով է ընդունվել Ջոն Տեր-Թադևոսյանի Երկրորդ սիմֆոնիան Փարաջանովին նվիրված ֆիլմ-կոլաժի երևանյան առաջնախաղը Շուշանիկ Կուրղինյան․ Մայրերը Եղիշե Չարենց. Եվ մի իրիկուն Պողոս առաքյալի նամակը Եփեսացիներին և Փիլիմոնին Աղոթք հիվանդների համար Կոմպոզիտոր Մաքսիմ Դունաեւսկին նշում Է 75-ամյա հոբելյանը Ռեժիսոր Կարո Բալյանը Ալեքսանդրինյան թատրոնում կներկայացնի «Շահանե. պոետի գաղտնիքը» բեմադրությունը Գերմանացի հանդիսատեսը հիացած էր հայ երաժիշտների կատարողական բաձր արվեստով Կատարվել են Մայր Աթոռ Սուրբ Էջմիածնի միաբանների հետևյալ նշանակումները Բրիտանացին գեղեցիկ կտավներ է ստեղծում՝ օգտագործելով մաշված ջինսե հագուստը Հայաստանի պետական սիմֆոնիկ նվագախմբի Լոնդոնում կայանալիք համերգը այսօր ուղիղ հեռարձակմամբ կցուցադրվի Հանրային հեռուստատեսության Youtube-ի և Facebook-ի էջերում Մատենադարանում սկսել են իրականացնել նաև պարսկերենով շրջայցեր Եղիշե Չարենց․ Անառակ որդիներին
website by Sargssyan