USD
EUR
RUB

Թովմա քահանա (Վահան) Անդրեասյան. Բանաստեղծություններ

 

«Սիլֆի նուրբ երազները» շարքից

Հայտնության պահ

Կյանքը երգ է՝

ուղարկված վերուստ:

Պտույտը մոլորակների, անկումն ասուպների,

բողբոջումը ծառերի, վազվզոցը քամիների,

ժպիտներն աղջիկների, քայլերը երեխաների,

գումարումը թվերի, սոսափյունն անտառների,

բախումը մտքերի, փոփոխությունը գույների,

խաղն ալիքների, ջերմությունը շապիկների,

թշշոցը թեյամանների, մոտեցումը պահերի,

անխուսափելիությունը հանդիպումների, գգվանքը

նախազգացումների, շարանն ամբոխների,

աղմուկը մեքենաների, հրահրոցն անվերջ

զգացմունքների, հոսքը բազմաձև պատկերների,

չարաճճիությունն անընդհատ սլացող վայրկյանների

- ահա, ձայները նրա, ահա, տիեզերական շքերթը

հնչյունների:

Երգում է ժամանակը, երգում է տարածությունը՝

աղավաղումները ջնջելով սպունգի նման,

ու երգը շարունակվում է, երգը շարունակվելու է

դադարների միջով և ոգեշնչման:

Կնոջս, որին դեռևս չեմ ճանաչում

Մի դար, գուցե երկու, աղոտ սենյակներում

երկար, սպիտակ շրջազգեստով

դանդաղորեն մոմը ձեռքիդ դու կշրջես,

ծանր, մուգ վարագույրների ետևում

կուրորեն դու կշրջես ուղեկցությամբ

մեղմաձայն կլավեսինի…

Ու կույր, ու երազկոտ ես կշրջեմ

նրբանցքներում խավար, հետո

իրար դիմաց կելնենք, դու՝ ծղոտե գիսախռիվ

քո մազերով,

ես՝ աչքերով իմ փակ, դեմքով ժպտուն:

Իրար դիմաց կելնենք, քանզի

արդեն մոմերը մեր իրար տեսան,

քանզի ինչ կույր է, ճիշտ է նկատում:

Հունվարյան առավոտ

Կաթնաթափանցիկ մի շղարշ,

լայն շնչառություն, բույրը ձյան,

ծառերի վրա սառցանախշ՝

բրոնզաթույր հազար - մի արձան:

Թիթեռներ սառցե, լույս կապույտ,

ջրաներկ է շաղ տվել այստեղ

մի վարպետ՝ ձեռքով շատ անփույթ,

խաղացել քամու վրձնով անեղ:

Նա հեռվից է սլացել, սահել

գգվանքի անձայն սահնակներով,

կոպերիս վրա պաղ շունչ ցողել,

ինձ շոյել թմբիր իր մատներով:

Օ գունեղ երազների կամար,

օ շնչառության ծով հեղեղ,

կհալչեմ քո մեջ, իմ լույս աշխարհ՝

ձյան փաթիլ դարձած կամ բյուրեղ:

Այս աշխարհը

Կանաչ, կապույտ եղևնիները

աղջամուղջի թափանցիկ ու յասամանագույն օդում,

մայրամուտի կարմիր ձևերը

և լռության վսեմ մեներգը հրաշագեղ այս բացատում…

Հանկարծ փայտփորը կտցարում է,

հեռվից արձագանքող հնչյունը դարմանում է ինչ-որ բան,

որ ինչ-որ տեղ ներսում նվվում էր,

և զգուշորեն քայլում ես, և նոր հնչյուններ որսում ապա…

Եվ զարմացած նայում ես շուրջդ․

կարծես ծնվել ես, առաջին անգամ ես գոյն այս տեսնում,

և ժամ առ ժամ խփում է մուրճը,

ազդարարում՝ ինչ հրաշալի է՜ - Տերն ինքն էլ է զարմանում£

Դենդրոպարկ

Այստեղ վրձինը Ռենուարի

կերտել է ծաղկանոցը՝

կարմիր, սպիտակ, կապույտ գույներ

և արևի լույս բոցը:

Նստարանից ելնում է նա,

թիթեռների միջով

գնում է դեպի արահետ

ինչ-որ մեկի կանչով:

Ախ, հա, Վեռլենն է դա հայտնի,

Սիլֆի նուրբ ձեռքերից

վերցրել է հյութը օդեղեն՝

հղված կապույտ երկնից:

Մեկնում է նա սկիհը ոսկե,

խմում են նրանք հերթով

ու ծիծաղում, ուրախանում

չքնաղ ակնթարթով:

Արահետներն են ինձ տանում,

սոճու թափված ասեղը

ոտքիս փարվում է հարճի պես,

և այդ գգվանքն անմեղ է:

Կիրճից կանչում է ինձ կկուն,

այնտեղ է Գարգառ գետը,

Վոլոշինն է ուռկան ձգել,

և Գրին ձկնորսն իր հետ է:

Ինձ բարևում են ձեռքերով,

ժպտում են նրանք՝ մեծերը,

և ես տեսնում եմ՝ իմ ներսում

ինչպես ուռչում է սերը:

Եվ ես դեմքեր եմ նկատում

ժպտուն ու պարզերես,

որ ծառների արանքներից

նայում են լուրթ ու հեզ:

Եվ եղևնու խիտ սաղարթում

աչքերս ծանրանում են,

պառկում եմ թավշե կանաչին,

և նիրհը ինձ տանում է:

Խաղաղության քուլաներում

լսում եմ լոկ այս բանը՝

տանտերն է ինձ անվերջ կրկնում․

- …վերջապես դու տանն ես:

Գիշերային որոտ

Միանգամից սկսվեց անձրևը՝

կարծես փայտիկով դիրիժորի,

խավարի մեջ թափվող հեղեղը

խառնվեց գետի խուռն ժխորին:

Գետը՝ թմբուկների թեթև ելույթ,

անձրևը՝ ծնծղա և ափսե,

մութ խավարում հնչում են նրանք,

ինչպես սպասում, ինչպես շշուկ,

ասեկոսե։

Եվ սևի մեջ գծագրվող կայծակը

անձայն լուսավորում է բլուրներին

կանգնած անտառը…

Թմբուկ, ծնծղա, ափսե և մեծ սպասում,

անձայն կայծակներում մեր դիրիժորը

դեռ չի ասում իր բառը:

Եվ մեկ էլ փայտիկով խրոխտ տանում է նա,

խփում է միաժամանակ հազար լիտավր…

Օ, Տեր Աստված, մեր աչքերում՝ ահ ու սարսափ,

իսկ սեղանից հանկարծ ընկնում է ջրով լի մեծ

գավը:

Աղբյուր՝ Andin.am

Լրահոս
Գթասրտություն Հնագետ Գրիգոր Արեշյանի հուղարկավորությունը տեղի կունենա Երևանի քաղաքային պանթեոնում Ամենայն Հայոց Կաթողիկոսը հեռակապով խոսել է Հյուսիսային Ամերիկայի հայոց թեմերի առաջնորդների հետ Սաղմոս ՃԽԱ Հովհաննես Հովհաննիսյան․ Հայ զինվորին Ծաղկաթերթեր Դերասանի մենախոսություն կյանքի իմաստի մասին. «Հեռագիր»-ը ցուցադրվեց «Արմմոնո» փառատոնին Կյանքի արվեստ. Սեռական դաստիարակության խնդիրը Կորյուն Առաքելյան. Բանաստեղծություններ Սամվել Մարգարյան․ Բանաստեղծություններ Մեզ հրամցված է մի չափորոշիչ, որն առանձին անձանց քմահաճույքի արդյունք է. Տեր Սարգիս Netflix-ը «Խոստումը» ֆիլմը ցուցադրելու հեղինակային իրավունք է ստացել Ընտանիք Համո Սահյան. Հորովել Եղիա Տեմիրճիպաշյան. Անգեղն երգ Պառավքարից մինչև Մուրղուզ․․․ Տավուշյան լեգենդներն ու զրույցները Օգոստոսի 1-ից Մոսկվայում վերաբացվում են կինոթատրոնները «Երեք մանկունքը բաբելոնյան հնոցում» սյուժեի պատկերագրական համակարգը «Այդ չափորոշիչները չեն արտացոլում ՀՀ քաղաքացու և հայ մարդու դաստիարակությունը»․ Աիդա Թոփուզյան Սուրբ Բարսեղ եպիսկոպոսի ճառը նախանձների մասին Խորհր­դա­յին նկա­րա­հա­վա­քի ա­զատ և ան­կախ նա­վար­կու­թ­յու­նը Օպերային թատրոնն առցանց համերգ կնվիրի կորոնավիրուսի պատճառով տուժած բոլոր երաժիշտներին «Այն մեկ ա­մի­սը, որ Պետ­րոս­ը կռ­վեց իմ կող­քին, հա­վա­սար էր տաս­ն­յակ կյան­քե­րի սխ­րան­քի» Արժևորենք կյանքի ամեն վայրկյանը Ս. Էջմիածնի Մատենադարանն առաջարկում է ընթերցել Վահե Երկանյանի «Պայքար հայկական նոր դպրոցի համար Անդրկովկասում «Music 20» միջազգային փառատոնին աշխարհի տարբեր ծայրերից հետևել է մոտ 45 հազար մարդ The Independent-ը դրական է արձագանքել Կոմիտասի «Սուրբ Պատարագի» համերգային ձայնագրությանը Վահագն Մուղնեցյան․ Նախանվագ Եղիշե Չարենց. ...Մայրամուտի այս սուրբ, հրակարմիր միգում Արսեն Գրիգորյանն ու «Հայ երգասաններ» նախագիծը երգ են նվիրել հայոց բանակին Հնդկաստանի դատարանը որոշել է Բաբրի մզկիթի տարածքը վերածել հինդու տաճարի Պահապան հրեշտակը պահպանում է մեզ Ռեմբրանդտի ինքնանկարը Լոնդոնում աճուրդի ընթացքում վաճառվել է ռեկորդային 18,7 միլիոն դոլարով Հուսիկ Արա. Սայթաքած ժամանակ Եղիա Տեմիրճիպաշյան. Մինակ Ձեր կյան­քի մո­լո­րու­թ­յամբ ձեզ մահ մի՛ ցան­կա­ցեք Բուհ չընդունված դիմորդները հանդիպեցին ԱԺ պատգամավորների հետ «Ազգասիրությունը նշանակում է սիրել ազգի կերտած մշակույթը». Գարեգին Երկրորդ Կաթողիկոս Ամենայն Հայոց «Չկա ծածուկ բան, որ չհայտնվի» Որոմը
website by Sargssyan