USD
EUR
RUB

«Հավատն առանց բարի գործերի կյանքի պատրանքն է միայն»

 

Փրկությունն աստվածային մեծագույն պարգև է, իսկ ժամանակակից մարդը հակված է այն ընդունելու որպես իր արժանիքին հատուկ ինչ-որ բան: Վերջնական և միաժամանակ անվերջանալի նպատակը մարդու աստվածացումն է: «Աստված մարդացավ, որպեսզի մարդն աստվածանա»,- ասել է Ս. Աթանաս Ալեքսանդրացին: Աստվածացումն իրականացվում է Աստծո օգնությամբ՝ եկեղեցում: Եկեղեցին որպես հիմք ունի Քրիստոսի փրկարար զոհաբերությունը, Նրա անարատ արյունը:

Միայն բարի գործերով հնարավոր չէ փրկվել, բարի գործերը հավատի և սիրո արտահայտման պայման են: Եկեղեցու հայրերից մեկը նշում է, որ փրկության արժանանալու հույս ունեցող մարդը, միայն բարի գործեր կատարելով, նման է այն աղքատին, որը, մի քանի արծաթ դրամ հավաքելով՝ երևակայում է, որ դրանով կարող է արքայական պալատ գնել: Միայն Աստծո օգնությամբ մարդ կարող է հասնել իր իրական կոչմանը: Ամենողորմ Աստված մարդուն փրկում է ուղղափառ հավատքի, բարի գործերի և Իր օրհնության միջոցով: Բարի գործերն ավետարանական պատվիրաններն են, առանց որոնց իրագործման և առանց հավատքի հնարավոր չէ փրկվել: Ուղղափառ հավատքն առանց գործերի, և բարի գործերն առանց հավատքի մեռած է (Հակոբ. 2:26): Փրկության տենչացողները պետք է ունենան թե՛ հավատ և թե՛ բարի գործեր:

Փրկվելու համար բավական չէ միայն հավատալը, և Քրիստոսի հետևյալ խոսքերը որպես արդարացում մատնացույց անելը, թե՝ ով որ հավատա և մկրտվի, կփրկվի, իսկ ով որ չհավատա, կդատապարտվի (Մարկ. 16:16): Քրիստոնյան պետք է արժանի լինի իր՝ քրիստոնյա անվանը և ապրի իր կոչմանը համապատասխան. «Եղբայրնե՛ր իմ, ի՞նչ օգուտ այն մարդուն, որ ասում է, թե հավատ ունի, երբ հավատն արտահայտող գործեր չունի: Մի՞թե այսպիսի հավատը կարող է փրկել նրան» (Հակոբ. 2:14): Մեր Տերն էլ Իր հերթին ասաց. «Չկարծեք, թե ով որ Ինձ «Տե՛ր, Տե՛ր» է ասում, Երկնքի Արքայություն է մտնելու, այլ մտնելու է միայն նա, ով կատարում է կամքը Իմ Հոր, որ երկնքում է» (Մատթ. 7:21): Նույնը և ուսուցանում է Պողոս առաքյալը. «Հայտարարում են, թե ճանաչում են Աստծուն, բայց իրենց գործերով ուրանում են Նրան, քանի որ պիղծ են, անհնազանդ և որևէ բարի գործի համար՝ անպիտան» (Տիտոս 1:16):

Եթե մարդը միայն հավատով փրկվի, ապա բոլոր մարդիկ կփրկվեն, քանի որ բոլորն էլ հավատում են, որ Աստված կա: Անգամ չար դևերն են հավատում, որ Աստված կա: Մինչ պիղծ ոգով մարդուն բժշկելը, դևերը Քրիստոսին ասում են. «Հիսո՛ւս Նազովրեցի, թո՛ղ, ի՞նչ ես ուզում մեզանից. մեզ ոչնչացնելո՞ւ եկար. գիտենք, թե ո՛վ ես դու. դու Աստծո սուրբն ես» (Մարկ. 1:24): Նոր Կտակարանի Գործք Առաքելոց գրքում նկարագրված է, թե ինչ էր աղաղակում հարցուկ ոգին Պողոս առաքյալի հետևից. «Այս մարդիկ Բարձրյալ Աստծո ծառաներն են, որոնք փրկության ճանապարհն են քարոզում» (16:17): Բարի է հավատը, եթե միատեղված է գործերին: Ս. Կյուրեղ Երուսաղեմացին ասում է, թե ի՞նչ օգուտ, երբ մարդն Աստծո խոսքը գիտի և ամոթալի է ապրում, նաև՝ ի՞նչ օգուտ, երբ մարդը զուսպ է, բայց Աստծո խոսքն է անարգում:

Ս. Հովհան Ոսկեբերանը խնդրում է և հորդորում, որ մեծ ջանքեր գործադրենք, որպեսզի ճշմարիտ հավատի մեջ մնանք և առաքինի կյանք վարենք, քանի որ եթե մեր հավատը միավորված չէ աստվածահաճո կյանքին, ապա կենթարկվենք առավել դաժան պատժի: «Քրիստոսի պատմած առակները՝ կույսերի, ուռկանի, փշերի, ծառի մասին, որոնք պտուղ չեն բերում, պահանջում են առաքինի լինել գործերի մեջ: Հավատն առանց բարի գործերի կյանքի պատրանքն է միայն: Ասենք, որ բարի գործերի մեջ ծուլացողը կրելու է անասելի և անտանելի տանջանքներ և լսելու է սարսափելի դատի դատավճիռը. «Այս անպիտան ծառային հանեցեք դո՛ւրս, խավարի մեջ: Թող լաց լինի այնտեղ և կրճտի ատամները» (Մատթ. 25:30): Տեսնո՞ւմ ես, որ ոչ միայն կողոպտիչը և չարիք գործողը կենթարկվի սարսափելի տանջանքների, այլ նաև նա, ով չի գործում բարին: Այսպիսով, ուշադրություն դարձնենք այս խոսքերին: Քանի դեռ ժամանակ ունենք, ջանք թափենք մեր փրկության համար, ձեթ պաշարենք ճրագի համար, ձեռք բերենք քանքար: Եթե այստեղ ծուլանանք և անհոգ ապրենք, ապա այնտեղ մեզ ոչ ոք չի գթա, եթե անգամ մեզանից արցունքի գետեր հորդեն: Մեկ քանքար ունեցողը վերադարձրեց իրեն վստահվածը և դատապարտվեց: Համառորեն խնդրում էին և թակում կույսերը, բայց զուր և անտեղի: Այսպիսով, իմանալով սա, գործածենք և՛ մեր գումարը, և՛ մեր ջանքերը և ամեն ինչ՝ ի օգուտ մերձավորի: Քանքար ասելով՝ նկատի է առնվում այն, ինչ գտնվում է մարդու իշխանության ներքո, լինի դա ունեցվածքը, ուսումը և նման բաներ: Այդ պատճառով ոչ-ոք չպետք է ասի՝ ես մեկ քանքար ունեմ և չեմ կարող ոչինչ անել: Կարող ես մեկ քանքարով էլ խրախուսանքի արժանանալ»:

Անկեղծ սրտով և հավատով բարին գործողը նմանվում է Աստծուն՝ ինչպես պատկերը նախապատկերին: Ինչպես բույսի աճի համար կարևոր են արևը, անձրևը և օդը, այնպես էլ մարդու հոգևոր աճի համար՝ հավատն ու բարի գործերը, անտրտունջ ու խոնարհ ներքին աշխատանքը:

Կազմեց Կարինե Սուգիկյանը

Աղբուր՝ Surbzoravor.am

Լրահոս
Հրաչյա Թամրազյան․ Կյա՜նք` դու զգում ես ինձ․․․ Վահն Տերյան․ Հրաժեշտի խոսքերից Նաղաշ Հովնաթան. Տաղ ի վերայ Գուրջստանայ գօզալներին Ռուբեն Որբերյան․ Հին տնակս Նավումի մարգարեությունը Հախնազարյանները՝ մեկ բեմում Մարզական պարերի առաջնություն. 300 մասնակից Հայաստանից, Արցախից, այլ երկրներից Սերգեյ Սմբատյանն ու Մալթայի ֆիլհարմոնիկ նվագախումբը հանդես կգան Մոսկվայի հեղինակավոր համերգասրահներում Մոսկվայում ժամանակավորապես կհայտնվի հայ ճարտարապետների նախագծած ամառային կինոդահլիճը Կարպիս Սուրենյան. Մայրենի լեզու և թարգմանություն Վրեժ Իսրայելյան․ Ես, մուսան և անդունդը Մենք մեր երկ­րում պե­տա­կան մա­կար­դա­կով վտան­գում ենք հա­յե­րե­նը «Վկայություններ կան, որ կարևոր որոշումներ կայացնելիս մեր պետության ղեկավարները պարտադիր առանձնազրույց են ունեցել այս կամ այն գրողի հետ» Գոհար Գասպարյանի անվան մեներգիչների համահայկական մրցույթը Դիարբեքիրի կիսաավեր հայկական եկեղեցին ոչնչանալու վտանգի տակ է. Ermenihaber Գրքի Երևանյան փառատոնի մեկնարկը՝ շուտով Օրհ­նե­ցե՛ք ձեզ հա­լա­ծող­նե­րին, օրհ­նե­ցե՛ք և մի՛ ա­նի­ծեք Մոսկվայում ավարտվեց հայոց թեմի քահանաների տարեկան ժողովը «Հույսդ դիր Աստծո վրա և բարիք գործիր» Ներկայացվելու են այն գծագրերը, որոնք Արտոն տրամադրել էր ինձ, և որոնք երբևէ չեն ցուցադրվել.Վահան Արծրունի. Ռուբեն Հովսեփյան. «Արագիլները վերադարձան» Եղիշե Չարենց. Ես այն չեմ այլևս Նկարիչ. Բենքսիի աշխատանքն աճուրդում վաճառում են անօրինական «Ով որ ձեր մեջ փոքրագույնն է, նա է մեծ» Օշականի Ս. Մեսրոպ Մաշտոց եկեղեցու որմնանկարը վերականգնվում է Յուրի Դավթյանը պարգևատրվել է «Հայրենիքին մատուցած ծառայությունների համար» 1-ին աստիճանի մեդալով Վահե ՔԱՉԱ. Փարիզեան պատկերներ Արվեստագետները կհարգեն քանդակագործ Արտո Չաքմաքչյանի հիշատակը նրան նվիրված համերգային ծրագրով Միայն հայ կոմպոզիտորների գործեր՝ Ջազ նվագախմբի համերգին Ո՛չ, ա­սում եմ ձեզ, սա­կայն, ե­թե չա­պաշ­խա­րեք, ա­մենքդ էլ նույն­պես պի­տի կոր­չեք Ռոման Պոլանսկու ֆիլմի պրեմիերան չի կայացել Վիլյամ Սարոյան. Հանճարը Էրմիտաժում Լեոնարդո դա Վինչիի կտավին փոխարինել է Բոտիչչելիի «Տիրամոր» պատկերը Վահագն Մուղնեցյան. «Ժպտա, երկինք» Հովհան Մանդակունի. Աղքատներին մխիթարելու մասին «Թռիչք կկվի բնի վրայով»՝ հայկական բեմում ԿԳՄՍ նախարարության պարզաբանումը Դալմայի այգու տարածքում 16-17 դդ քանդված գինու հնձանի վերաբերյալ Քրիստոնյաներին սպանել են մուսուլմանները, հայերը դարձել են ցեղասպանության զոհերի մարմնացումը Ռոբերտ Ամիրխանյանի ծննդյան օրն է Ռուբեն Հովսեփյան. Նռներ
website by Sargssyan