Հայ Ֆեստը մեկնարկեց

ԵՐԵՎԱՆ, 3 ՀՈԿՏԵՄԲԵՐԻ, Irates.am: Հոկտեմբերի 1-ին Երևանի Հակոբ Պարոնյանի անվան պետական երաժշտական կոմեդիայի թատրոնում տեղի ունեցավ «Հայ Ֆեստ» 17-րդ միջազգային թատերական փառատոնի բացումը: Թատերասերները հնարավորություն ունեցան դիտելու Ռյազանի պետական դրամատիկական թատրոնի բեմադրած Յ. Վ. Գյոթեի «Ֆաուստ» ողբերգությունը: Մինչ փառատոնի մեկնարկը թատրոնի հարակից տարածքում ցուցադրվեց «Միմո Կրոկոդիլ» թատրոնի (Սանկտ Պետերբուրգ ) բացօթյա «Ճանապարհորդություն» ներկայացումը:

«Հայ ֆեստը» հյուրնկալել է 24 երկրից ժամանած մոտ 300 մասնակիցների և հյուրերի: Փառատոնի շրջանակում Երևանի 14 թատրոներում կցուցադրվի ավելի քան 45 ներկայացում:

Փառատոնի նախագահ Արթուր Ղուկասյանը լրագրողների հետ զրույցում նշեց, որ ըստ համաեվրոպական փառատոնային ասոցիացիան «Հայ ֆեստը» համարվել է Եվրոպայի 24 լավագույն փառատոններից մեկն է. «Դա ոգեշնչում, պատիվ է մեզ համար, ընտրությունը, իմ կարծիքով, բարդ է, որովհետև վեց ամիս հանձնախումբը քննարկում էր»:
Այս տարի «Հայ ֆեստը» կրում է « Իմաստը ներկայում է» («The meaing is now») խորագրիը: Տևելու է հոկտեմբերի 1- 8-ը:

Անժելա ՎԱՐԴԱՆՅԱՆ