USD
EUR
RUB

«Կոմիտասյան գոհարները ոչ ոք չի խլի, եթե ինքներս չկորցնենք դրանք»

 

ԵՐԵՎԱՆ, 30 ՆՈՅԵՄԲԵՐԻ, Aravot.am: Օպերային երգչուհի Վարսենիկ Ավանյանի հետ մեր հանդիպման առիթը Youtube-ում նոյեմբերի կեսերին տեղադրված «Քարեղեն երաժշտություն» ֆիլմն էր, որը ներկայացնում էր երգչուհու արտասահմանյան ելույթներից մեկը՝ «համեմված» հայկական ճարտարապետական կոթողներով, այդ թվում՝ Գառնու տաճար, Սեւանավանքի Սուրբ Առաքելոց եւ Սուրբ Աստվածածին եկեղեցիներ: Ֆիլմում կան պատկերասրահում նկարահանված կադրեր: Նկարներից ու քանդակներից ճանաչելի են Նիկողայոս Նիկողոսյանի աշխատանքները: Տեսաֆիլմը սկսվում է երգչուհու հյութեղ մեցցո սոպրանոյով հնչող Կոմիտասով:

«Առավոտի» հետ հանդիպման ժամանակ Վարսենիկ Ավանյանը հայտնեց, որ ֆիլմի հեղինակը ռեժիսոր, օպերատոր Եվգենի Բենինն է, նկարահանումներն արված են հայ ճանաչված նկարչի ու քանդակագործի մոսկովյան Niko պատկերասրահում:

Երգչուհին վերջին շրջանում հաճախ է հանդես գալիս մենահամերգներով: Մասնագետներն ու հանդիսատեսը հատկապես տպավորված են նրա մեկնաբանմամբ ֆրանսիական եւ գերմանական ծրագրերով: Միայն այս տարի նա ունեցել է 7 մենահամերգ՝ նվիրված Կոմիտասի ծննդյան 150 եւ Ավետ Տերտերյանի 90-ամյա հոբելյաններին: Կամերային երեկոներից 4-ը կայացել են Մոսկվայում, Սանկտ Պետերբուրգում, Կլայպեդայում եւ Վիլնյուսում: Վերադարձից հետո էլ օրերս Վարսենիկ Ավանյանը նույն ծրագրով հանդես եկավ ՀԲԸՄ-ի դահլիճում:

Երգչուհին Ելենա Օբրազցովայի կենտրոնում Կարինա Պողոսբեկովայի հետ

Ներկայացնելով արտասահմանյան մենահամերգները, արվեստագետը նշեց, որ մերձբալթյան համերգներին աջակցել են կրթության, գիտության, մշակույթի եւ սպորտի նախարարությունը, ինչպես նաեւ Մերձբալթյան երկրներում Հայաստանի դեսպանությունը: «Մերձբալթյան համերգներին ինձ ուղեկցում էին անակնկալներ, ավելի ճիշտ՝ հպարտության առիթներ: Կլայպեդայում եւ Վիլնյուսում ինձ նվագակցող կոնցերտմայստերիցս՝ Նարա Ստեփանյանից, որը Երեւանից տեղափոխվելուց հետո գործունեություն է ծավալել Կլայպեդայի երաժշտական ակադեմիայում եւ երաժշտական թատրոնում, տեղեկացա, որ որդին՝ Արամ Մուրադյանը, նվաճել է ուշուի աշխարհի չեմպիոնի տիտղոսը: Կլայպեդայի ֆրանցիսկյան եկեղեցում ունեցած երեկոյի ավարտին էլ հոգեւոր հայրը՝ եղբայր Բենեդիկտը, ներկայացրեց հայերենից իր թարգմանությամբ Նարեկացու «Մատյան որբերգության»-ը: Կոմիտասից ու Տերտերյանից բացի, ներկայացրի նաեւ Էդվարդ Աբրահամյանի ռոմանսներից եւ հոգեւոր երաժշտություն: Հանդիսատեսի, այդ թվում մասնագետների ջերմ ընդունելությունից արդեն որերորդ անգամ համոզվեցի, որ ես հզոր մշակույթ կրող ազգի ներկայացուցիչ եմ»,- հայտնեց մեր զրուցակիցը: Հավելեց նաեւ, թե մերձբալթյան համերգներին մասնակցություն է ունեցել Վիլնյուսի օպերային թատրոնի մեներգիչ Ստեփոնաս Զոնիսը:

Ստեփոնաս Զոնիսի եւ Նառա Ստեփանյանի հետ

Սանկտպետերբուրգյան եւ մոսկովյան համերգների առիթով էլ նշեց, որ Երեւան վերադառնալուն պես իրեն զանգահարել է երաժշտագետ Օլեսիա Բոբրիկը եւ շուրջ 2 ժամ խոսել կոմիտասյան երաժշտության մասին, որակելով այն ոչ եվրոպական, ոչ էլ արեւելյան, այլ, մասնագետի խոսքերով՝ «էլեգանտ»: Երգչուհին ափսոսանքով փոխանցեց երաժշտագետի հետեւյալ միտքը՝ «շատ եմ շրջագայում, բայց հիմա մոտս մեծ զարմանք է, թե ինչու աշխարհում Կոմիտաս չի հնչում, կամ գուցե հնչում է, ես չեմ հանդիպել…»:

Անդրադառնալով Մոսկվայում նկարահանված ֆիլմին, մանրամասնեց, թե Niko պատկերասրահում կայացած համերգի առիթով աջակցություն է ստացել Նիկողայոս Նիկողոսյանի դուստր եւ արվեստագետի պատկերասրահի տնօրեն տիկին Գայանեից: Եվ Մոսկվայում, եւ Սանկտ Պետերբուրգում Ելենա Օբրազցովայի մշակույթի կենտրոնում կայացած մենահամերգներին իրեն նվագակցել է մեր հայրենակից, Մոսկվայի Չայկովսկու անվան պետական կոնսերվատորիայի դասախոս Կարինա Պողոսբեկովան: Մեր զրուցակիցը հատուկ շնորհակալություն հայտնեց կոմպոզիտոր Ստեփան Ռոստոմյանին, որը մինչ արտասահմանյան շրջագայությունը իրեն «զինել է» կոմիտասյան այնպիսի տեղեկություններով, որոնց, երգչուհու պնդմամբ՝ չենք հանդիպի Վարդապետին նվիրված որեւէ աշխատության մեջ: Ասաց նաեւ, թե կայացած 4 երեկոներից 3-ը վարել է ինքը, իսկ վիլնյուսյան մենահամերգը՝ Մերձբալթյան երկրներում ՀՀ դեսպան Տիգրան Մկրտչյանը:

«Ինձ այսօր իսկապես տանջում է ռուսաստանցի երաժշտագետի զարմանքը, թե ինչու աշխարհում մինչ օրս ինքը կոմիտասյան երաժշտության չի հանդիպել: Գուցե անհրաժեշտ է էլ ավելի լծվել Կոմիտաս քարոզելուն: Պարզ է՝ կոմիտասյան գոհարները մեր ձեռքից ոչ ոք չի խլի, եթե ինքներս չկորցնենք դրանք… Ունեցել ենք, չէ՞, Տիգրան Մեծ, Ծովից ծով Հայաստան… Ո՞ւր է հիմա… Ախր Կոմիտասի վաստակը ազգային վերածննդի դարաշրջանի գեղարվեստական գաղափարների կուտակումն է, դրանց մարմնավորման կենսունակ ձեւերի հայտնաբերումը: Եվ նա հիմնվելով մեր երաժշտության խոր ու բազմակողմանի ուսումնասիրության վրա, առաջ քաշեց հայ երաժշտության ինքնուրույնության կարեւոր թեզը եւ իր բազմաբնույթ գործունեությամբ հիմնադրեց ազգային դասական երաժշտությունը, ընդ որում՝ կանխանշելով նրա հետագա զարգացման ուղիները»,- հայտնեց մեր զրուցակիցը:

Սամվել ԴԱՆԻԵԼՅԱՆ

Լրահոս
Հրանտ Մաթևոսյան․ Գոմեշը Ղևոնդ Ալիշան. Հրազդան Deutsche Welle-ն անդրադարձել է Գազայի հատվածի հայազգի լուսանկարչի արխիվին Գիտնականները պարզել են` իրականում ինչ տեսք է ունեցել Ռաֆայել Սանտին Մեր խիղճը կփրկի մեզ Դատաստան, հալածանքների պատճառը Պարույր Սևակ. Անտառի վեպը Սուրբ Բարսեղ Կեսարացի եպիսկոպոսապետի ճառը Սուրբ Երրորդության մասին «Մոսկվայի «Գարաժում» հայ ճարտարապետների կառուցած ամառային կինոթատրոնը շատ զիլ է ստացվել» Թանգարանը կարիք ունի այցելուների, մեր թախիծն է, որ թանգարանը չի գործում նախկին աշխուժությամբ. Ա. Իսահակյանի անվան թանգարանի տնօրեն Ավետիք Իսահակյան․ Թե դեպի կյանքը, թե դեպի մարդիկ Մուշեղ Իշխան․ Տապանագիր ՀՐԱՏԱՐԱԿՈՒԹԵԱՆ ԿԸ ՊԱՏՐԱՍՏՈՒԻ «ԿԱՆՈՆԱԳԻՐՔ ՀԱՅՈՑ»-Ը՝ ՏԻՐԱՅՐ Ծ. ՎՐԴ. ՏԷՐՎԻՇԵԱՆԻ ԱՇԽԱՏԱՍԻՐՈՒԹԵԱՄԲ Ո՞րն է ձեր ընտրությունը Կամերային կենտրոնը կներկայացնի Ռիշար Գալիանոյի մասնակցությամբ «Տարվա եղանակներ» համերգի տեսագրությունը Երևանի Օղակաձև զբոսայգում ուղղվել և ներկայացվել է սխալ տեղադրված վիշապաքարը Ո՞ւմ կամ ինչի՞ վրա հույս դնել Հրաչյա Թամրազյան․ Փոխակերպություն Ռազմիկ Դավոյան. Ինձ էլ աշխարհից մի բան հասավ «Մինչև ե՞րբ պիտի գամված մնաս, ո´վ ծույլ․․․» Սաղմոս ՃԽԲ Հին Թիֆլիսի երգիչը ՀՀ տարածում Հնագիտության և ազգագրության ինստիտուտի արշավախումբը փաստագրել է մոտ 100 վիշապաքար Համո Սահյան. Անձրև Վահագն Դավթյան. Անի Ապահովություն Զրույց «ոչնչի» շուրջ Մահացել է «Ոսկե գլոբուս»-ի կազմակերպիչ Լորենցո Սորիան «Հացի բազմացումը» տեսարանի պատկերագրական դրսևորումը Եղիշե Չարենց․ Մայրամուտներ Պարույր Սևակ․ Անակնկալ հայտնագործություն Երբ փրկությունը սերն է. Լիլյա Մուկուչյանի դերակատարմամբ ներկայացումը կցուցադրվի «Արմմոնո» փառատոնին Քարոզչություն «Առնո Բաբաջանյանը» ոչ թե ախտահանվել, այլ արտաքինից մաքրվել է Վիեննայի օպերան Պլասիդո Դոմինգոյին պարգևատրել է արվեստում ունեցած ներդրման համար Ռազմիկ Դավոյան. Արարչություն Հայաստանում հնչեցին Ալեքսեյ Շորի ստեղծագործությունները Վստահություն Սրբին մեծարելը նրան ընդօրինակելն է Հավատարմություն
website by Sargssyan