Մուշեղ Իշխան․ Հայրենակից Ուր Կերթաս

Ծովուն վրայ եւ հողին,
Օդերուն մէջ հեռահաս
Հայը կ՛երթայ, կը սուրայ
Խենթ հովերուն հետ բախտին…

Հայրենակից, ո՞ւր կ՛երթաս.
Ամէն երթի ու կայքի
Տե՛ս, վրայէդ կը թափի
Հայու հոգիդ մաս առ մաս…

Հայը կ՛երթայ, կը սուրայ
Հորիզոններ հեռակայ
Եւ արծաթի մը համար
Կը զոհէ գանձ ու գոհար…

Երկրէ երկիր, ափէ ափ,
Այսպէս մոլոր, վազնէ վազ,
Քիչ մ՛աւելի գունաթափ,
Հայրենակից, ո՞ւր կ՛երթաս…