Յոգան չի կարող մարդուն տանել Աստծու մոտ

Էլլադայի ուղղափառ եկեղեցու Սրբազան սինոդը յոգան անվանել է կտրականապես անհամատեղելի քրիստոնեության հետ: Սինոդը հայտարարել է, որ յոգան հինդուիզմի հիմնարար մաս է, ոչ թե ֆիզիկական վարժությունների շարք և տեղ չունի քրիստոնյայի կյանքում: ԷՈՒԵ-ն բացատրել է, որ իր հայտարարությունը պատասխանն է հունական թերթերի հորդորների՝ կարանտինի ժամանակ ստրեսը հանելու համար զբաղվել յոգայով: Սինոդը հարգում է հավատի ազատությունը, բայց ընդգծում որ եկեղեցին պարտավոր է իր հոտի մասին հոգ տանել: Ուղղափառ եկեղեցին Հունաստանում ունի պետական կարգավիճակ, երկրի բնակչության 90%-ը ԷՈՒԵ-ի հավատացյալներ են: Այլ կրոնների ու հավատների ներկայացուցիչները նույնպես դատապարտել են յոգայի պարապմունքները: Թեպետ նման քննադատություն եկեղեցին հաճախ է հնչեցնում, բայց Սրբազան Սինոդի պաշտոնական հայտարարությունը արտառոց է հնչում:

«Եկեղեցին յոգան չի ընդունում նրանց փորձի հիման վրա, որ զբաղվել են յոգայով,-հունական հեռուստատեսությամբ բացատրել է Էլլադակի եկեղեցու հոգևորական հայր Միխայիլ Կոնստանտինիդիսը:-Եթե յոգան մարդուն տար անհրաժեշտը, մենք միայն ուրախ կլինեինք»: Յոգան չափազանց տարածվել է աշխարհում վերջին տասնամյակներում և հիմա վիթխարի ինդուստրիա է դարձել: Յոգան հաճախ են գովազդում իբրև ստրեսից ազատվելու, հոգեկան ինքնազգացողության և ֆիզիկական ուժերի բարելավման միջոց: Կորոնավիրուսի պանդեմիայի սկզբից շատ երկրներում յոգայով զբաղմունքները խորհուրդ են տալիս իբրև ստրեսի դեմ պայքարի և ֆիզիկական մարզավիճակը կարանտինի ժամանակ պահպանելու միջոց:
Հունաստանին հաջողվել է խուսափել պանդեմիայի լուրջ վնասներից, շատերի կարծիքով՝ մայիսի սկզբից սահմանված կոշտ լոկդաունի շնորհիվ: 11 միլիոն բնակչություն ունեցող Հունաստանում գրանցվել է կորոնավարակի 3000 դեպք և 180 մահ:
BBC

Հ.Գ. Յոգայի ու քրիստոնեության համատեղելիության բանավեճերը սկսվել են 20-րդ դարասկզբից, երբ արևմտյան ինտելեկտուալները սկսեցին ակտիվ հետաքրքրվել արևելյան հոգևոր մշակույթով: Յոգայի հանրաճանաչության պատճառով թեման շարունակվում է ակտուալ մնալ: Հռոմի Ֆրանցիսկոս պապը նախազգուշացրել է, որ յոգան չի կարող մարդուն տանել Աստծո մոտ: Համայն Ռուսիո պատրիարք Կիրիլը կոչ է արել տարբերել յոգայի ֆիզիկական ու հոգևոր բաղադրիչները: Նա վատ ոչինչ չի տեսնում ֆիզիկական վարժությունների մեջ, «բայց յոգան ուղեկցվում է մեդիտացիայով, որին ես մեծ զգուշությամբ եմ վերաբերվում»: Պատրիարքը հատկապես ուղղափառ երիտասարդներինն կոչ է արել չտարվել մեդիտացիայով:
Պատրիարքը շարունակում է հայր Ալեքսանդր Մենի հաստատած ավանդույթը: Վերակառուցման ժամանակների հայտնի ուղղափառ քարոզիչը 7 հատորանոց ուսումնասիրության հեղինակն է՝ «Կրոնի պատմություն. Ճանապարհի, Ճշմարտության ու Կյանքի որոնումներում»: Նա ուսումնասիրել է հինդուիզմն ու բուդդայականությունը և եզրակացրել, որ քրիստոնյաները կարող են զբաղվել միայն խատխա յոգայով, որ կազմված է շնչառական ու ֆիզիկական վարժություններից: Իսկ ռաջա յոգան այլ արժեհամակարգ ու աշխարհընկալում է դավանում:

Անահիտ ԱԴԱՄՅԱՆ

Աղբյուր՝ Irates.am