Առցանց ցուցահանդես-մրցույթի հաղթողները

Առցանց ցուցահանդես-մրցույթի հաղթողները

ԵՐԵՎԱՆ, 13 ՀՈՒՆԻՍԻ, Irates.am: Ալեքսանդր Սպենդիարյանի անվան օպերայի և բալետի թատրոնը հայտարարել էր առցանց ցուցահանդես՝ նվիրված երեխաների պաշտպանության միջազգային օրվան։ Թատրոնի փոքրիկ հանդիսականները օրեր շարունակ մասնակցեց օպերային և բալետային թեմաներով գեղանկարչական աշխատանքների մրցույթին:

Առաջին տեղը զբաղեցրել է ամենաշատ հավանումների արժանացած աշխատանքը: Բայց քանի որ Վարդգես Մկրտչանի և Արմինե Ավետիսյանի աշխատանքների հավանումների քանակների տարբերությունը շատ քիչ էր, որոշվեց առաջին տեղը կիսել երկու մասնակիցների միջև: Այսպիսով՝ առաջին հորիզոնականն են զբաղեցնում Վարդգես Մկրտչյանը (11 տ.) և Արմինե Ավետիսյանը (12 տ.): Թատրոնի աշխատակիցները որոշվեց նաև փոքր ինչ փոխել մրցույթի ի սկզբանե հայտարարված կանոնները և ավելացնել ևս 2 մրցանակ՝ 2-րդ և 3-րդ հորիզոնականներում գտնվող աշխատանքների հեղինակների համար։ 2-րդ հորիզոնականը զբաղեցնում է Սերժ Իշխանյանը (11 տ.): 3-րդ հորիզոնականը զբաղեցնում է Նարե Իսահակյանը (13 տ.): Հատուկ մրցանակների արժանացան Խոսրով Գևորգյանը (9 տ.), Վահե Սահակյանը (10 տ.), Յանա Խաչատրյանը (12 տ.), Սարգիս Նալբանդյանը (13 տ.), Մերի Խաչատրյանը (13 տ.), Հատուկ մրցանակ է սահմանվել նաև ամենափոքրիկ մասնակցի՝ Ելենա Եփրեմյանի (4 տ.) համար: Թատրոնի գործունեությունը վերսկսելուց հետո նախատեսվում է Թատրոնի ճեմասրահում կազմակերպել մրցույթի աշխատանքների ժամանակավոր ցուցադրություն։ Հայաստանի օպերայի և բալետի թատրոնի գլխավոր մուտքի մոտ մրցույթի հաղթողներին հանձնվեցին մրցանակները:

«Համավարակի ամբողջ այս ընթացքում Հայաստանի օպերայի և բալետի թատրոնը ներկայանում է առցանց ծրագրերով և մենք այս հարթակը օգտագործելով փորձում ենք չկտրել կապը հանդիսատեսի հետ,- ասաց Ա. Սպենդիարյանի անվան օպերայի և բալետի ազգային ակադեմիական թատրոնի մարքեթինգի և PR բաժնի ղեկավար Իրինա Գոգինյանը։- Արդեն գրանցվել է թատրոնի ֆեյսբուքյան էջում դիտումների աննախադեպ մեծ թիվ մեր առցանց ցուցադրություններն ու տարբեր նախագծերը ունեցել են ավելի քան 5 միլիոն դիտում: Իսկ հունիսի 1-ին ընդառաջ Հայաստանի օպերայի և բալետի թատրոնի Մարքեթինգի և PR բաժնի նախաձեռնությունը նպատակ ուներ հատուկ ուշադրության արժանացնել նաև մեր փոքրիկ հանդիսականներին և գեղանկարչական աշխատանքների մրցույթ-ցուցահանդեսով ներգրավել մեր առցանց ծրագրերում: Հայաստանի օպերայի և բալետի թատրոնը մշտապես մեծապես կարևորում է մեր ապագա հանդիսատեսի ձևավորման գործը և այդ ուղղությամբ արված գործուն քայլերից մեկն էլ նաև այս մրցույթն էր: Իսկապես հիացած ենք մեր երեխաների տաղանդով, ակտիվությամբ, օպերայի և բալետի նկատմամբ հետաքրքրությամբ: Պայծառ սերունդ ունենք, որոնք կասկած չկա, որ մեր թատրոնի վաղվա արժանի հանդիսականը կլինեն»:

Լուսանկարներ

Հետևեք մեզ նաև Telegram-ում